भोर शहराला आता दररोज पाणीपुरवठा

भोर, ता. ३० : भोर शहराला बुधवारपासून (ता.३०) दररोज पाणीपुरवठा करण्यास सुरुवात केली असल्याची माहिती मुख्याधिकारी तथा प्रशासक गजानन शिंदे आणि पाणीपुरवठा विभाग प्रमुख उमेश घाडगे यांनी दिली. उन्हाळ्याच्या कालावधीत मे महिन्यापासून शहराला दिवसाआड पाणीपुरवठा केला जात होता. शहराला पाणीपुरवठा करणाऱ्या योजनेची जॅकवेल ही भाटघर धरणाच्या भिंतीच्या खालच्या(बाहेरील) बाजूला असल्यामुळे धरणातील पाणीसाठा कमी झाल्यानंतर भोर शहराचा पाणीपुरवठा दिवसाआड सुरु केला होता. सद्यःस्थितीत धरण १०० टक्के भरल्यामुळे शहराचा पाणीपुरवठा पूर्ववत झाला आहे. शहरातील सुमारे ३ हजार ६०० पाणीपुरवठा जोडणी असून दररोज सुमारे ४० लाख लिटर पाण्याचे वितरण केले जात आहे. सद्यःस्थितीत भोर शहराला पाणीपुरवठा करण्यासाठी भाटघर धरणाखालील जॅकवेल मध्ये ९० एचपीचे तीन पंप, ६० एचपीचे दोन पंप आणि ५० एचपीचा एक पंप कार्यरत आहेत. मात्र ९० एचपीचा एक आणि ६० एचपीचा एक असे दोन पंप २४ तास सुरू आहे.