भोरमध्ये डॉ. बापूजी साळुंखे यांना अभिवादन

भोर, ता. ८ : स्वामी विवेकानंद शिक्षण संस्थेच्या श्री छत्रपती शिवाजी विद्यालय व कनिष्ठ महाविद्यालय आणि गर्ल्स हायस्कूल यांच्या वतीने शिक्षण महर्षी डॉ. बापूजी साळुंखे यांच्या ३८ व्या स्मृतिदिनानिमित्त विशेष कार्यक्रम घेण्यात आला. यावेळी चर्चासत्र झाले, तर बापूजी साळुंखे यांच्या प्रतिमेची मिरवणूक काढण्यात आली.
मुख्याध्यापक ए. के. काळभोर यांच्या मार्गदर्शनाखाली शुक्रवारी (ता. ८) सकाळी विद्यालयात झालेल्या कार्यक्रमाच्या अध्यक्षस्थानी रामदास जेधे होते. भोर नगरपालिकेचे माजी नगरसेवक यशवंत डाळ, सोमनाथ ढवळे युवराज जेधे, सूर्यकांत किंद्रे, विजय जाधव, जतीन गुजराथी, युवराज जेधे व अतुल शेडगे आदींसह शिक्षक, विद्यार्थी आणि पालक उपस्थित होते. कल्याणी निंबाळकर व सेजल साळेकर या विद्यार्थिनींनी डॉ. बापूजी साळुंखे यांच्या जीवनातील घटना सांगितल्या. प्रा. एस. आर. शिकलगार आणि एच. एम. पवार या शिक्षकांनी विद्यार्थ्यांना मार्गदर्शन केले. डॉ. बापूजी साळुंखे यांनी स्थापन केलेल्या स्वामी विवेकानंद शिक्षण संस्थेतून लाखो विद्यार्थ्यांना शिक्षणाबरोबर संस्कार मिळाल्याची माहिती शिक्षकांनी दिली.
कार्यक्रमानंतर डॉ. बापूजी साळुंखे यांच्या प्रतिमेची शहरातून मिरवणूक काढण्यात आली. मिरवणुकीत विद्यार्थ्यांनी स्वामी विवेकानंद, बापूजी साळुंखे आणि सावित्रीबाई फुले यांच्या वेशभूषा साकारल्या होत्या. ज्योती दीक्षित यांनी प्रास्ताविक केले. संतोष घोरपडे यांनी सूत्रसंचालन तर संभाजी बांदल यांनी आभार मानले.