भोर बाजार समितीच्या माजी सभापतींवर गुन्हा दाखल

भोर, ता. ४ : जुन्या भांडणाच्या रागातून मोटारीने दुचाकीला ठोकर देवून लहान मुलीसह दोघांना जीवे मारण्याचा प्रयत्न केल्याप्रकरणी भोर तालुका कृषी उत्पन्न बाजार समितीचे माजी सभापती अंकुश पांडुरंग खंडाळे (रा. येवली ता भोर) यांच्यावर भोर पोलिसांनी गुन्हा दाखल केला. सांगवी हिमा येथे गुरुवारी (ता. २) दुपारी सव्वाबाराच्या सुमारास ही दुर्घटना घडली.
सचिन शिवाजी जांभूळकर (वय ४०), धनश्री शशिकांत जांभूळकर (वय ११) असे जखमी झालेल्यांची नावे आहेत. तर फिर्यादी सचिन जांभूळकर आणि त्यांची पुतणी धनश्री हे दोघेजण नवीन दुचाकीवरून कापूरव्होळ बाजूकडे निघाले होते. त्यावेळी समोरून अंकुश खंडाळे हा मोटारीतून येत होता. त्यांच्या मोटारीने सचिन यांच्या दुचाकीला समोरून ठोकर दिली. त्यामुळे त्या दोघांना गंभीर दुखापत झाली. याशिवाय दुचाकीचा चक्काचूर झाला. अपघातानंतर अंकुश खंडाळे पळून गेला. त्यानंतर रस्त्याने जाणाऱ्या अनोळखी मोटारचालकाने दोघांना भोरमधील हॉस्पिटलमध्ये उपचारासाठी दाखल केले. शुक्रवारी (ता.३) सायंकाळी सचिन शुद्धीवर आल्यानंतर पोलिसांनी हॉस्पिटलमध्ये जाऊन त्याचा जबाब घेतला. गेल्या वर्षी फिर्यादी यांनी अंकुश खंडाळे यांच्याविरुद्ध भोर पोलिस ठाण्यात फिर्याद दाखल केली होती. त्याचा राग मनात धरून अंकुशने अंगावर मोटार घालून ठार करण्याचा प्रयत्न केला. यापूर्वीही त्याने घरी जात असताना अंगावर मोटार घालण्याचा प्रयत्न केला होता, असे फिर्यादीत नमूद केले आहे. पोलिस उपनिरीक्षक अनिल चव्हाण पुढील तपास करीत आहेत.