मतदार नोंदणीसाठी भोरमध्ये ५ केंद्रे

भोर, ता. ७ : पुणे विभागाच्या पदवीधर आणि शिक्षक मतदारसंघाच्या निवडणुकीसाठी तालुक्यात मतदार नोंदणीस सुरुवात झाली असून, पात्र मतदारांनी नावनोंदणी करावी, असे आवाहन प्रांताधिकारी डॉ. विकास खरात व तहसीलदार राजेंद्र नजन यांनी केले.
भारत निवडणूक आयोगाच्या आदेशानुसार पुणे विभागाच्या पदवीधर आणि शिक्षक मतदारसंघाच्या निवडणुकीचा कार्यक्रम जाहीर झाला आहे. त्यानुसार प्रांताधिकारी खरात यांनी सोमवारी (ता. ६) तहसील कार्यालयात राजकीय पक्षांच्या प्रतिनिधींची बैठक घेतली. त्यावेळी ते बोलत होते. त्यांनी सांगितले की, पदवीधर शिक्षक मतदारसंघासाठी भोर तालुक्यात भोर, भोलावडे, आंबेघर, किकवी आणि नसरापूर ही ५ मतदान केंद्रे असून, त्याठिकाणी पदनिर्देशीत अधिकाऱ्यांची नियुक्ती केली आहे. या पाच मतदानकेंद्रांसाठी मतदार नोंदणी कार्यालय उघडले आहेत. यामध्ये भोर मतदान केंद्रासाठी प्रांताधिकारी कार्यालय, भोलावडे केंद्रासाठी तहसील कार्यालय, आंबेकर केंद्रासाठी गटविकास अधिकारी कार्यालय, किकवी केंद्रासाठी मुख्याधिकारी भोर नगरपालिका आणि नसरापूर केंद्रासाठी गटशिक्षणाधिकारी कार्यालय भोर, आदींचा समावेश आहे. या पाच ठिकाणी कार्यालयीन वेळेत नावनोंदणीसाठी संपर्क साधावा, असेही प्रांताधिकारी खरात यांनी सांगितले.