साहित्यश्री राष्ट्रीय पुरस्कार डॉ. जाधव यांना जाहीर

भोर, ता. २३ : येथील फुले-शाहू-आंबेडकर विचार प्रसारक मंडळाचे कार्याध्यक्ष डॉ. रोहिदास जाधव यांना नवी दिल्ली येथील भारतीय दलित साहित्य अकादमीच्या वतीने डॉ. बाबासाहेब आंबेडकर साहित्यश्री राष्ट्रीय पुरस्कार जाहीर झाला. साहित्य क्षेत्रातील भरीव योगदानाबद्दल दिला जाणाऱ्या या पुरस्काराचे स्वरूप सन्मानचिन्ह, सन्मानपत्र व रोख रक्कम असे आहे. १२ डिसेंबर रोजी नवी दिल्ली येथे होणाऱ्या विशेष कार्यक्रमात डॉ रोहिदास जाधव यांना हा पुरस्कार प्रदान करण्यात येणार असल्याचे भारतीय दलित साहित्य अकादमीचे राष्ट्रीय अध्यक्ष डॉ सुमन शंकर यांनी जाहीर निवेदनात सांगितले आहे.
भारतीय दलित साहित्य अकादमीची स्थापना भारताचे भूतपूर्व उपपंतप्रधान बाबू जगजीवनराम यांनी केली असून मिझोरामचे माजी राज्यपाल डॉ पद्मनाभन, माजी केंद्रीय गृहमंत्री सुशीलकुमार शिंदे, माजी केंद्रीय सामाजिक न्याय मंत्री डॉ. सत्यनारायण जटिया, माजी केंद्रीय मंत्री संघप्रिया गौतम हे या अकादमीचे विश्वस्त आहेत. या सर्व विश्वस्तांच्या समितीने डॉ. रोहिदास जाधव यांची राष्ट्रीय पुरस्कारासाठी निवड केली. डॉ रोहिदास जाधव यांचे आंबेडकरी चळवळीतील सामाजिक व साहित्य विषयक योगदान भरीव असून त्यांचे अनेक ग्रंथ प्रकाशित झाले आहेत. त्यांचे विविध स्वरूपाचं स्फुट लेखनही प्रसिद्ध आहे. भोर तसेच जगभरात आयोजित होत असलेल्या फुले-शाहू-आंबेडकर विचार प्रसार संमेलनाच्या आयोजनात त्यांचा मोलाचा वाटा असतो. डॉ.जाधव यांच्या सर्व स्तरातील मान्यवरांकडून अभिनंदन केले जात आहे.

6115