भोरमध्ये आज रंगणार बालसाहित्य संमेलन

भोर, ता. ९ : येथील भोर एज्युकेशन सोसायटीच्या राजा रघुनाथराव विद्यालय व कनिष्ठ महाविद्यालयात शनिवारी (ता. १०) बालसाहित्य संमेलनाचे आयोजन केले आहे. त्यात पाठ्यपुस्तकातील लेखक विद्यार्थांच्या भेटीला येणार आहेत, अशी माहिती संस्थेच्या नियामक मंडळाचे अध्यक्ष प्रमोद गुजर व सचिव डॉ. सुरेश गोरेगावकर यांनी दिली.
भोर एज्युकेशन सोसायटीचे अध्यक्ष राजेशराजे पंतसचिव यांच्या मार्गदर्शनाखाली होणाऱ्या या एकदिवशीय साहित्य संमेलनाचे उद्‍घाटन लेखिका मंगला गोडबोले यांच्या हस्ते होणार आहे. शनिवारी सकाळी ९ ते सायंकाळी ५ या वेळेमध्ये हे संमेलन पार पडणार आहे. संमेलनात इयत्ता नववी व दहावीच्या बालभारतीच्या (मराठी) पुस्तकांसाठी लेखन करणारे लेखक सहभागी होणार आहेत. यामध्ये मंगला गोडबोले यांच्यासह लेखीका क्षितिज देसाई, निलिमा गुंडी, फारूक काझी, मृणाल कानिटकर, एकनाथ आव्हाड, संगीता बर्वे, अक्षया वाटवे, आश्लेषा महाजन, मकरंद जोशी, डॉ. चित्रलेखा पुरंदरे, संगीता पुराणीक आदींचा समावेश आहे. दिवसभरात ते विद्यार्थ्यांशी संवाद साधून त्यांना मार्गदर्शन करणार आहेत. संमेलनाची सुरुवात ग्रंथदिंडीने होणार असून, दिवसभरात कथा लेखन, नाट्य लेखन, गद्य- पद्य अभिवाचन, नाट्य छटा, प्रवास वर्णन, ललित लेखन, संवाद लेखन, लेखक गप्पा इत्यादी कार्यक्रम होणार आहेत. पुणे येथील छात्र प्रबोधन, पुणे नगर वाचन मंदिर आणि भोर एज्युकेशन सोसायटी यांच्या संयुक्त विद्यमाने लेखक भेट आणि विद्यार्थी संवाद या भेटीचे आयोजन केले आहे.