हिर्डोशी शाळेस साहित्य भेट

भोर, ता. ९ ः हिर्डोशी (ता. भोर) येथील जिल्हा परिषदेच्या प्राथमिक शाळेस तीन उद्योजकांकडून संगणक, सीसीटीव्ही, वॉटर फिल्टर, खेळाचे साहित्य आणि पुस्तके भेट देण्यात आली.
पुण्यातील उद्योजक किरण गुजर, सुभाष शिर्के आणि संजीव ओक यांनी शुक्रवारी (ता. ९) दुपारी हिर्डोशीच्या शाळेच्या मुख्याध्यापिका वैशाली वाबळे यांच्याकडे या भेटवस्तू सुपूर्त केल्या. येथील शाळा ही दुर्गम भागात असल्यामुळे विद्यार्थ्यांसाठी सोयीसुविधांची अभाव आहे. त्यामुळे शिक्षक आणि शाळा व्यवस्थापन समितीचे अध्यक्ष दिलीप धामुणसे यांनी उद्योजकांकडे विद्यार्थ्यांसाठी सोयी निर्माण करण्याची विनंती केली होती. त्यास प्रतिसाद देत किरण गुजर, सुभाष शिर्के आणि संजीव ओक यांनी विद्यार्थ्यांना आवश्यक असलेल्या वस्तू भेट दिल्या.
यावेळी शाळा व्यवस्थापन समितीचे अध्यक्ष दिलीप धामुणसे, उपाध्यक्ष मीना धामुणसे, अंकुश धामुणसे, चाकण (ता. खेड) येथील वनपरिक्षेत्र अधिकारी संतोष कंक, पंचायत समितीचे माजी उपसभापती सुनील भेलके, धोंडिबा मालुसरे, कोंडिबा धामुणसे, हनुमंत धामुणसे, लक्ष्मण धामुणसे यांच्यासह ग्रामपंचायतीचे पदाधिकारी पालक व शिक्षक उपस्थित होते.
विद्यार्थ्यांचे आरोग्य चांगले राहावे, यासाठी वॉटर फिल्टर आणि शाळेच्या सुरक्षिततेसाठी सीसीटीव्ही दिले असून, विद्यार्थ्यांची गुणवत्ता वाढविण्यासाठी संगणक आणि पुस्तके दिली असल्याचे किरण गुजर यांनी सांगितले. दानशूर व्यक्तींनी दिलेल्या शैक्षणिक साहित्यामुळे विद्यार्थ्यांची गुणवत्ता सुधारणार असल्याचे मुख्याध्यापिका वैशाली वाबळे यांनी सांगितले.

06297