बारामतीत पावसाची तासभर जोरदार हजेरी

बारामती, ता. २ : शहरात रविवारी (ता. २) संध्याकाळी सहाच्या सुमारास मुसळधार पाऊस झाला. गेल्या काही दिवसांपासून तापलेल्या उन्हामुळे बारामतीकरांची लाही लाही झाली होती. आजही सकाळपासूनच उन्हाचा तडाखा जाणवत होता. दुपारनंतर आभाळात ढगांची गर्दी झाली होती, संध्याकाळी सहाच्या सुमारास पावसास प्रारंभ झाला अर्ध्या तासाहून अधिक काळ जोरदार पाऊस बरसला. पावसासोबत वाऱ्याचा वेगही मोठा होता. या पावसाने शहरातील अनेक रस्त्यांवर पाणी साचून राहिले होते. अनेक इमारतींमध्ये विशेषतः बेसमेंटमध्ये रस्त्यावरून वाहणारे पाणी घुसल्याने व्यापारी संकुलात तळी साचली होती. रस्त्यावर साचून राहणारे पावसाचे पाणी हा पावसाळ्यात नेहमीचाच विषय बनलेला असूनही त्याकडे प्रशासन लक्ष देत नाही, रस्त्यांवर पाणी साचून राहत असल्याने डांबरीकरण केलेले रस्तेही खड्डेमय होऊ लागले आहेत. शहरातील भिगवण रस्त्यावर या पावसाने पाण्याचे तळे साचले होते. या तळ्यातून लोकांना वाट काढत कसरत करत जावे लागत होते. अनेक ठिकाणी सुशोभीकरणाची कामे सुरू आहेत, मात्र पावसाचे पडणारे पाणी वाहून जाण्याची व्यवस्था नसल्याने लोकांना या पाण्यातून मार्गक्रमण करावी लागत आहे.नगरपालिकेने रस्त्यावर असणाऱ्या पाण्याबाबत उपाययोजना करावी अशी बारामतीकरांची मागणी आहे.