पालखी सोहळ्याच्या स्वागतासाठी बारामती सज्ज

पालखी सोहळ्याच्या स्वागतासाठी बारामती सज्ज

बारामती, ता. ५ : संत तुकाराम महाराज पालखी सोहळ्याचे शनिवारी (ता. ६) तसेच श्री संत सोपानकाका महाराज पालखी सोहळ्याचे मंगळवारी (ता. ९) बारामती शहरात आगमन होत आहे. त्यासाठी बारामती नगरपालिका प्रशासनाने जय्यत तयारी केल्याची माहिती मुख्याधिकारी महेश रोकडे यांनी दिली.
पालखीचा मुक्काम शारदा प्रांगण येथे होणार असून त्यासाठी नगरपालिकेने मंडप उभारला आहे. वारकऱ्यांची गैरसोय होऊ नये यासाठी युद्धपातळीवर प्रशासन ॲक्शन मोडवर आहे. स्वत: उपमुख्यमंत्री अजित पवार यंदा बारामती ते काटेवाडी अंतर चालत पालखी सोहळ्यात सहभागी होणार असल्याने प्रशासनाने अधिक तयारी केली आहे.
पालखी मार्गावरील रस्‍त्‍याचे पॅच वर्क झाले असून वारकरी पुतळा सुशोभीकरण झाले आहे. रस्‍त्याची स्वच्छ‍ता, संपूर्ण शहरात धूर फवारणी, सार्वजनिक शौचालय दुरुस्ती आणि स्वच्छतेची कामे पूर्ण झाली आहेत.
सर्व पथदिवे सुस्थितीत राहतील याची खबरदारी घेतली आहे. स्वच्छ, शुद्ध पाणी पुरवठा सुरळीत राहील याची दक्षता घेतली आहे. शहरातील हातपंप दुरुस्त करून विंधन विहीरी निर्जंतुकीकरण करण्यात आले आहे. शारदा प्रांगण येथे मंडप, व्यासपीठ उभे केले आहे. वीज, स्वच्छतागृह, स्नानगृह तसेच निवाऱ्याची व्यवस्था केली आहे. पालखीच्या कामासाठी मुख्याधिकाऱ्यांसह ४५० कर्मचारी कार्यरत आहेत.
टि. सी. कॉलेज, विद्या प्रतिष्ठानचे विद्यार्थी स्वच्छता करणार आहेत. यंदा १२०० स्वच्छतागृह विविध ठिकाणी लावण्याचे नियोजन केले आहे. मार्केट यार्ड-इंदापूर रस्ता, मोतीबाग चौक, घोलप ऑटो, हॉटेल सुदित, देसाई इस्टेयट, तुपे बंगला, कुलकर्णी बंगला, रेल्वे स्टेशन, पतंजली स्टोअर-भिगवण रस्ता, शिवकृपा सोसायटी, गोरे चाळ, श्रॉफ पेट्रोल पंप, नेवसे रस्ता, दाते गणेश मंदिर, सांस्कृतिक केंद्र, वणवे मळा, नाना नानी पार्क, पांढरीचा महादेव, कृषी उत्पन्न बाजार समिती (जळोची) येथे ही स्वच्छतागृहे असतील. बारामती नगरपरिषद आणि सजग नागरिक मंच यांनी शौचालय व्यवस्थापनाचे नियोजन केले आहे.

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com