बारामतीचा जिरायत शिक्का पुसणार

बारामती, ता. ४ : गेल्या अनेक वर्षांपासून बारामतीच्या काही भागावर असलेला जिरायत हा शिक्का कायमचा पुसून टाकण्यासाठी एक हजार कोटी रुपयांची महत्वाकांक्षी नीरा कऱ्हा उपसा जलसिंचन योजना कार्यान्वित करण्याची प्रक्रीया सुरु झाली आहे.
उपमुख्यमंत्री अजित पवार यांनी बारामतीत आयोजित मेळाव्यात याबाबत माहिती दिली. जवळपास ४५ हजार एकराला या योजनेमुळे पाणी मिळणार आहे. त्यामुळे उसासारखे पीक या परिसरात शेतकऱ्यांना योजनेच्या कार्यान्वयनानंतर घेता येईल, असेही अजित पवार यांनी सांगितले.
या योजनेबाबत माहिती देताना ते म्हणाले, ‘‘या योजनेत २.३० मीटर व्यासाची पाइपलाइन करण्यात येणार आहे. पहिल्या टप्प्यात २३२८६ व दुसऱ्या टप्प्यात १४९९५ अश्वशक्तीच्या दोन मोटारी बसविण्यात येणार आहेत. एकूण १७ किलोमीटर लांबीची ही पाइप लाईन असेल. या योजनेमध्ये नीरा डावा कालव्याच्या प्रभावक्षेत्राबाहेरील ३३ गावांचा समावेश करण्यात आला आहे. दरवर्षी पावसाळ्यात वाहून जाणाऱ्या पाण्याचे नियोजन करून दोन टीएमसी पाणी शेतीसाठी या योजनेद्वारे वापरता येणार आहे. सौरऊर्जेवर या उपसा जलसिंचन योजनेचे पंप चालविण्याचे नियोजन आहे. त्या मुळे वीजबिलाचा बोजा पडणार नाही.’’

या योजनेत समाविष्ट गावे
वाकी, भिलारवाडी, मुढाळे, ढाकाळे, चोपडज, चौधरवाडी, देऊळवाडी, गडदरवाडी, मगरवाडी, सस्तेवाडी, खंडोबावाडी, पणदरे, वाघळवाडी, करंजेपूल, वडगाव निंबाळकर, कोऱ्हाळे बुद्रुक, जळकेवाडी, खामगळवाडी, सोनकसवाडी, कुरणेवाडी, माळेगाव बुद्रुक, माळेगाव खुर्द, कऱ्हावागज, बारामती ग्रामीण, नेपतवळण, मेडद, काळखैरेवाडी, शेरेवाडी, बाबुर्डी, काऱ्हाटी, जळगाव सुपे, अंजनगाव (यात नीरा डावा कालवा व जनाई शिरसाई योजनेच्या लाभक्षेत्राबाहेरील भागाचा समावेश आहे.)