बारामती रेल्वे स्थानकावरील पोलिस चौकी बंदचा निर्णय

बारामती, ता. १९ : एकीकडे विकसित शहर म्हणून ओळख असलेल्या बारामती रेल्वे स्थानकाची पोलिस चौकीच बंद करण्याचा निर्णय रेल्वे विभागाने घेतला आहे. याची तातडीने अंमलबजावणी देखील केली आहे. बारामतीची पोलिस चौकी दौंड पोलिस ठाण्यात विलीन करण्यात आल्याचे सांगण्यात आले. या पुढील काळात दौंडवरून दोन रेल्वे पोलिस बारामतीला येऊन बारामतीच्या रेल्वे स्थानकावर चोवीस तास सेवा देणार असल्याची माहिती आहे.
वास्तविक बारामती- दौंड- बारामती हा रेल्वे प्रवास नाममात्र दरात होत असल्याने त्याचा वापर विद्यार्थी व आर्थिकदृष्ट्या दुर्बल घटकातील लोक मोठ्या संख्येने करतात. या पार्श्वभूमीवर रेल्वे स्थानक व रेल्वे प्रवासात देखील प्रवाशांची सुरक्षितता हा मुद्दा महत्त्वाचा आहे. असे असतानाही बारामती रेल्वे स्थानकावरील चौकीच बंद करण्याचा अजब निर्णय रेल्वे मंत्रालयाने घेतला.
बारामतीला या पूर्वी एक पोलिस उपनिरिक्षक, एक सहायक फौजदार, दोन हवालदार व दोन कर्मचारी, अशी सहा जणांची टीम कार्यरत होती. येथील चौकीही कार्यरत असायची. आता एक फतवा काढून अचानकच फक्त दोनच पोलिस कर्मचाऱ्यांवर बारामती रेल्वे स्थानकाची चोवीस तासांची जबाबदारी सोपविण्यात आली आहे.
दरम्यान, कालच (मंगळवार) शिर्सुफळ ते दौंड दरम्यान एका प्रवाशाला चार जणांनी चाकूचा धाक दाखवीत लुटल्याची घटना घडली आहे. या पार्श्वभूमीवर पोलिस बंदोबस्त वाढविण्याऐवजी तो कमी करण्यात आला, याचे आश्चर्य व्यक्त होत आहे.