वाहनांच्या ‘एचएसआरपी’साठी ३० जूनपर्यंत मुदतवाढ

बारामती, ता. २५ : राज्यातील १ एप्रिल २०१९ पूर्वीच्या नोंदणीकृत वाहनांवर उच्च सुरक्षा नोंदणी क्रमांक पाटी (एचएसआरपी) बसविण्याकरिता ३० जून २०२५ पर्यंत मुदतवाढ दिल्याची माहिती बारामतीचे उपप्रादेशिक परिवहन अधिकारी सुरेंद्र निकम यांनी दिली.
वाहनांवर एचएसआरपी बसविण्याकरिता यापूर्वी ३१ मार्च २०२५ पर्यंत बसविण्याचे निर्देश दिले होते. परंतु जुन्या वाहनांना एचएसआरपी बसविण्याचे काम अपेक्षेप्रमाणे न झाल्यामुळे ही मुदतवाढ दिली आहे.
एका ठिकाणी किमान २५ किंवा २५ पेक्षा अधिक दुचाकी, चारचाकी, ऑटोरिक्षा, टॅक्सी, बस, ट्रक मालकांनी एचएसआरपी बसविण्याकरिता अर्ज केल्यास त्यांच्या सोयीच्या ठिकाणी किंवा गृहनिर्माण संस्थांमध्ये संबंधित एजन्सीमार्फत कोणतेही अतिरिक्त शुल्क न आकारता एचएसआरपी बसविण्यात येईल. या बारामती उपप्रादेशिक परिवहन कार्यक्षेत्रातील वाहनांना एचएसआरपी बसविण्याकरिता M/s FTA HSRP Solutions Pvt Ltd या उत्पादकाची निवड केली आहे. वाहनचालकांनी आपल्या वाहनांवर एचएसआरपी बसविण्याकरिता ऑनलाइन अपॉइंटमेंटसाठी https://transport.maharashtra.gov.in/ZoneWiseWebsiteRedirect.html या संकेतस्थळाला भेट द्यावी. मोटारसायकल व ट्रॅक्टरकरिता ४५० रुपये, तीनचाकी वाहनांकरिता ५०० रुपये आणि सर्व प्रकारचे चारचाकी वाहनांकरिता ७४५ रुपये तसेच, वस्तू व सेवा कर आकारला जात आहे. हे शुल्क ऑनलाइन स्वरूपातच भरावे लागणार आहे, असे निकम यांनी नमूद केले.