बारामती एमआयडीसीतील सुविधांसाठी पाठपुरावा करू

बारामती, ता. ८ : येथील बारामती इंडस्ट्रिअल डेव्हलपमेंट असोसिएशनने बारामती व पणदरे एमआयडीसी औद्योगिक क्षेत्रातील लहानमोठ्या उद्योगांचे समस्या सोडविण्यासह शासनाकडून उद्योगांना आवश्यक पायाभूत सोयीसुविधा मिळवून देण्यासाठी वैयक्तिक पाठपुरावा करू, अशी ग्वाही उद्योगमंत्री उदय सामंत यांनी दिली.
चौंडी येथील मंत्रीमंडळाच्या बैठकीसाठी निघाले असताना बारामती विमानतळावर असोसिएशनच्या पदाधिकाऱ्यांनी सामंत यांची भेट घेतली, त्याप्रसंगी त्यांनी ही ग्वाही देत बारामतीच्या प्रस्तावांबाबत मंत्रालय स्तरावर कार्यवाहीचे आश्वासन दिले.
बारामती इंडस्ट्रिअल डेव्हलपमेंट असोसिएशनचे अध्यक्ष धनंजय जामदार, उपाध्यक्ष मनोहर गावडे, सचिव अनंत अवचट, सदस्य हरिचंद्र खाडे यांच्यासह एमआयडीसीचे प्रादेशिक अधिकारी हनुमंत पाटील, कार्यकारी अभियंता विजय पेटकर, उपअभियंता उपेंद्र गलांडे उपस्थित होते.
उपमुख्यमंत्री अजित पवार यांच्याकडे हे सर्व प्रस्ताव सादर केले असून त्यांचे एकत्रित निवेदन उद्योगमंत्री उदय सावंत यांना दिले आहे, त्यावर लवकर कार्यवाही होण्यासाठी उद्योगमंत्र्यांना विनंती केली असल्याचे जामदार यांनी सांगितले.

उद्योजकांच्या मागण्या
• कामगारांसाठीच्या इएसआयसी हॉस्पिटलसाठी पाच एकर जागा हस्तांतर करणे.
• पणदरे एमआयडीसीमध्ये मोठ्या क्षमतेची पाण्याची टाकी उभारणे.
• बारामती एमआयडीसीला पिण्याचा पाणीपुरवठा होण्यासाठी नीरा डावा कालव्यावरून पाइपलाइन मंजूर करणे.
• बारामती एमआयडीसीलगत ड्रायपोर्टची निर्मिती करणे.
• बारामती एमआयडीसीमध्ये लघुउद्योगांसाठी लहान भूखंड उपलब्ध करून देणे,.
• घनकचरा व्यवस्थापन प्रकल्पासाठी भूखंड राखीव ठेवणे.
• भविष्यातील वाहतूक व पार्किंग समस्या विचारात घेऊन नवीन ट्रक टर्मिनससाठी जागा उपलब्ध करणे.
• एमआयडीसी क्षेत्रातील बांधकामांचे रेडी रेकनरचे वाढीव दर कमी करणे.