बारामतीत सायरनची व्यवस्थाच नाही

बारामती, ता. १० : सध्याच्या युद्धजन्य परिस्थितीच्या पार्श्वभूमीवर आणीबाणीची स्थिती निर्माण झाल्यास नागरिकांना धोक्याचा संदेश देण्यासाठी बारामती येथे सायरनची व्यवस्थाच अस्तित्वात नसल्याचे समोर आले आहे. या परिस्थितीच्या पार्श्वभूमीवर प्रशासनाची फारशी सज्जता नसल्याचेही यामधून दिसत आहे. अशी परिस्थिती निर्माण झाल्यास नागरिकांनी काय केले पाहिजे? याचे प्रशिक्षण देण्याची गरज निर्माण झाली आहे.
युद्ध सुरू होण्यापूर्वी देशात अनेक ठिकाणी मॉकड्रील घेतले गेले. ड्रोनसह क्षेपणास्त्र हल्ला झाला किंवा विमानातून हल्ला होणार असेल, तर नागरिकांना धोक्याची सूचना देण्यासाठी सायरन वाजविला जातो. अनेक शहरात अशी व्यवस्था उपलब्ध आहे, पण बारामतीत अशी व्यवस्थाच प्रशासनाकडे नसल्याची बाब समोर आली आहे.
गेल्या अनेक वर्षात अशी स्थिती कधी निर्माण झाली नाही. बारामती हे सीमारेषेपासून दूरवर असल्याने कोणाला कधी सायरनची आवश्यकताच वाटली नाही ही वस्तुस्थिती आहे. मुंबईला हाय अलर्ट दिला जातो, तेव्हा महाराष्ट्रापर्यंत हे संकट येणार असेल, तर बारामतीतही ही यंत्रणा कार्यान्वित व्हायला हवी, अशी नागरिकांची मागणी आहे. एका ठिकाणी सायरन वाजवून चालणार नसल्याने व शहराची व्याप्ती कमालीची वाढलेली असल्याने महत्त्वाच्या ठिकाणी व विशेषतः ज्या भागात लोकसंख्येची घनता अधिक आहे, अशा ठिकाणी ही व्यवस्था तातडीने उभारण्याची नागरिकांची मागणी आहे. आपत्ती व्यवस्थापनाअंतर्गत ही सुविधा गरजेची आहे.

जिल्ह्यात अनेक ठिकाणी सायरन नाही
केवळ बारामतीच असे नाही, तर पुणे जिल्ह्यात अनेक तालुक्यांच्या ठिकाणी सायरनची व्यवस्थाच उपलब्ध नसल्याची माहिती पुढे आली आहे. आणीबाणीच्या प्रसंगी नागरिकांना सावध करण्यासाठी प्रशिक्षण देणे, माहिती देणे व सायरन बसविणे अशा बाबी करण्याची गरज निर्माण झाली आहे.