बारामतीत बारकोड असलेले विवाह नोंदणीप्रमाणपत्र मिळेना

बारामती, ता. १० : शहरातील सिल्व्हर ज्युबिली रुग्णालयात दिल्या जाणाऱ्या विवाहनोंदणी प्रमाणपत्रावर डिजिटल बार कोड नसल्याने अनेक ठिकाणी त्याचा उपयोगच होत नसल्याची बारामतीकरांची तक्रार आहे. बारामतीत दिले जाणारे विवाहनोंदणी प्रमाणपत्र फक्त विहित नमुन्यात दिले जाते, मात्र बारकोड नसल्याने अनेक ठिकाणी ते कुचकामी ठरते.
राज्य शासनाने जन्म, मृत्यू प्रमाणपत्रासह विवाह नोंदणीचे प्रमाणपत्र तालुका स्तरावर उपजिल्हा रुग्णालयातून घेणे २०१६ पासून अनिवार्य केलेले आहे. ग्रामपंचायत कार्यक्षेत्र व महानगरपालिका कार्यक्षेत्रातील रुग्णालयातून हे विवाह प्रमाणपत्र घेतले, तर त्याला डिजिटल बार कोड येतो मात्र तालुकास्तरावर हा बारकोड येत नसल्याने नगरपालिका कार्यक्षेत्रातील लोकांना याचा विनाकारण मनस्ताप सहन करावा लागत आहे.

ही त्रुटी आहे, ही वस्तुस्थिती आहे, महाऑनलाइनकडे याबाबत प्रस्ताव दिलेला असून, येत्या महिन्याभरात याचे सॉफ्टवेअर तयार होईल आणि त्यानुसार बारकोड असलेली डिजिटल स्वरूपातील विवाहनोंदणी प्रमाणपत्र दिली जातील.
-राजरत्न वाघमारे, उपसंचालक, आरोग्यसेवा