पालखी सोहळ्यात यंदाही भिसे प्रतिष्ठानचा दवाखाना

बारामती, ता. ३ : येथील कै. रामचंद्र भिसे (गुरुजी) वैद्यकीय प्रतिष्ठानच्या वतीने यंदा संत तुकाराम महाराज पालखी सोहळ्यादरम्यान मोफत दवाखाना चालविला जाणार आहे. या उपक्रमाचे यंदाचे २५वे वर्ष आहे, अशी माहिती या प्रकल्पाचे प्रमुख डॉ. विजय भिसे यांनी दिली.
दरवर्षी वारकऱ्यांवर मोफत औषधोपचार करण्यासह वारीत सहभागी भाविकांवर प्रतिष्ठानच्या रुग्णवाहिकेतून मोफत औषधोपचार केले जातात. देहू ते पंढरपूरदरम्यान सर्व ठिकाणी पूर्ण वेळ रुग्णांना सेवा पुरविण्याचे काम या प्रतिष्ठानच्या वतीने केले जाते. या पथकात भिसे यांच्यासह डॉ. अप्पा आटोळे, डॉ. योगेश पाटील, तसेच राजेंद्र गायकवाड हेही सहभागी होणार आहेत. वारकऱ्यांसह पालखी काळात या मार्गावर मोफत तपासणी व औषधोपचार करणाऱ्या व्यक्ती व संस्थांनाही औषधांची मदत प्रतिष्ठान पुरविणार असल्याचे भिसे यांनी सांगितले. यंदाही रुग्णवाहिकेची सेवा पुरविली जाणार आहे. या उपक्रमात ज्यांना औषधांच्या स्वरूपात काही हातभार लावायचा असेल त्यांनी ९३२५३३०६२४ या क्रमांकावर संपर्क साधण्याचे आवाहन केले आहे.