न्याय्य प्रभाग रचनेसाठी शरद पवार यांना साकडे

बारामती, ता. १० : राज्य निवडणूक आयोगाने बारामती नगर परिषद क्षेत्रासाठी दिलेल्या प्रभाग रचनेतील अन्याय्य रचनेच्या पार्श्वभूमीवर बारामतीतील सर्वपक्षीय शिष्टमंडळाने ज्येष्ठ नेते शरद पवार यांची नुकतीच भेट घेत निवेदन सादर केले. या मुद्द्याकडे गांभीर्याने लक्ष देऊन निवडणूक आयोगाशी चर्चा करून नव्याने व न्याय्य पद्धतीने प्रभाग रचना व्हावी,अशी विनंती शिष्टमंडळाने शरद पवार यांना केली.
प्रभाग रचनेत लोकसंख्या व भौगोलिक स्थितीच्या निकषांचे पालन न केल्यामुळे दलित, अल्पसंख्याक व वंचित समाजाच्या राजकीय प्रतिनिधित्वावर परिणाम झाला असल्याचे निवेदनात नमूद केले आहे. या निवेदनात म्हटले आहे की, शहरातील काही भागांमध्ये एकाच समाजाचे एकत्रित प्रभाग तयार करून निवडणूक प्रक्रियेवर प्रभाव टाकण्याचा प्रयत्न झालेला आहे. काही भागांमध्ये प्रभाग रचनेचे कोणतेही संकेत न पाळता मनमानी पद्धतीने विभागणी केली आहे. त्यामुळे समाजाच्या न्याय्य प्रतिनिधित्वास बाधा निर्माण झाली आहे. हे सर्वपक्षीय पदाधिकारी विविध राष्ट्रीय नेत्यांच्या भेटी घेणार आहेत.
या प्रसंगी विद्या प्रतिष्ठानचे खजिनदार युगेंद्र पवार यांच्यासह ॲड. अशोक इंगुले, काळुराम चौधरी, ॲड. सुधीर पाटसकर, सुजित वायसे, सुनील सस्ते, फैय्याज इलाही शेख, ॲड. संदीप गुजर, सत्यव्रत काळे, मंगलदास निकाळजे, वीरधवल गाडे, ॲड. राहुल शिंदे, रवींद्र सोनवणे, ॲड. अमोल सातकर, अभिजित कांबळे, संजय वाघमारे यांच्यासह विविध पक्षीय नेते उपस्थित होते.