मंगळसूत्र हिसकावल्याने बारामतीत महिला जखमी

बारामती, ता. ८ : शहरातील कसब्यातील पुलावर मंगळवारी (ता. ८) रात्री साडेआठच्या सुमारास एका महिलेच्या गळ्यातील मंगळसूत्र हिसकवण्याचा प्रयत्न दोन चोरट्यांनी केला. या घटनेमध्ये सदर महिला दुचाकीवरून खाली पडून जखमी झाली आहे.
या संदर्भात बारामती शहर पोलिस ठाण्यात फिर्याद दाखल केली आहे. ४ जुलै रोजी रात्री ही घटना घडली. यामध्ये जयश्री रतीलाल गायकवाड (रा. जामदार रोड, कसबा, बारामती) यांच्या गळ्यातील मंगळसूत्र हिसकवण्याचा अयशस्वी प्रयत्न चोरट्यांनी केला, मात्र या वेळी त्या गाडीवरून खाली पडून जखमी झाल्या. त्यांच्यावर खासगी दवाखान्यात उपचार सुरु आहेत. यामध्ये त्यांच्या गळ्यातील मंगळसूत्र तुटून खाली पडले. चोरटे माळेगावच्या दिशेने पळून गेल्याचे त्यांनी सांगितले.
दरम्यान, बारामती शहर व तालुका पोलिस ठाण्याच्या हद्दीत घडलेल्या एकाही गुन्ह्याचा तपास लावण्यात पोलिसांना अपयश आले असून, अशा घटनांमुळे महिलांमध्ये काळजीचे वातावरण आहे. सीसीटीव्ही बघून तपास केला जातो, प्रत्यक्षात आरोपींपर्यंत पोलिस पोहोचू शकत नसल्याचे समोर आले आहे.