मोकाट जनावरांच्या मालकांवर दाखल होणार गुन्हे

बारामती, ता. ९: शहरातील रस्त्यांवर मोकाट फिरणाऱ्या जनावरांच्या मालकांवर कठोर कायदेशीर कारवाई तसेच प्रसंगी फौजदारी गुन्हा दाखल करण्याचा इशारा बारामती नगरपरिषदेचे मुख्याधिकारी पंकज भुसे यांनी दिला आहे. या संदर्भात प्रसिध्दीस दिलेल्या पत्रकात त्यांनी नमूद केले आहे की, शहरात गाई, बैल व गाढव या भटक्या जनावरांमुळे सार्वजनिक मालमत्तेच्या नुकसानीसह पदपथ व रस्त्यावरून चालणाऱ्या नागरिकांच्या जीवितास धोका तसेच वाहतुकीसही अडथळा निर्माण होत आहे. यामुळे जनावरे मोकळी न सोडता मालकांनी ताब्यात ठेवावीत. शहरात पदपथ, रस्त्याच्या दुभाजकामध्ये मोठ्या प्रमाणात वृक्षलागवड करण्यात आली आहे. या भटक्या जनावरांमुळे सार्वजनिक मालमत्तेचे व झाडांचेही मोठे नुकसान होत आहे. ही जनावरे शहरातील व बाह्य परिसरातील नागरिकांच्या मालकीची असल्याचे निदर्शनास आले आहे. येत्या काळात नगरपरिषदेच्या वतीने ही जनावरे कोंडवाड्यात स्थलांतरित करून संबंधित जनावरांच्या मालकांवर गुन्हे दाखल करण्यात येतील, तसेच दंडात्मक कारवाईही केली जाईल.