बारामतीत मारहाणप्रकरणी सहा जणांवर गुन्हा दाखल

बारामती, ता. १३ : ज्या कर्जप्रकरणात जामीनदार म्हणून राहायचे होते, त्या प्रकरणाऐवजी एजंटने दुसऱ्याच कर्जप्रकरणाचा जामीनदार केल्याप्रकरणी जाब विचारण्यासाठी गेलेल्या सागर शंकर दळवी (वय. ३८, रा. सिद्धेश्वर गल्ली, बारामती) यास मारहाण करण्यात आली. याप्रकरणी बारामती शहर पोलिसांनी सहा जणांविरुद्ध गुन्हा दाखल केला आहे.
याप्रकरणी सागर दळवी यांनी फिर्याद दिली असून त्यावरून पोलिसांनी अक्षय गावडे, प्रतीक राऊत, कारंडे व इतर तीन अनोळखी व्यक्तींविरोधात गुन्हा दाखल केला आहे. बुधवारी (ता. ९) गुनवडी चौकातील एका इलेक्ट्रॉनिक्स दुकानाबाहेर ही घटना घडली. यावेळी माऊली गावडे याच्यासोबत वाद का घालतोस, असे म्हणत सहा आरोपींनी लाथा बुक्क्यांनी दळवी यांना मारहाण केली. हातातील कडे डोक्यात मारल्याने दळवी जखमी झाल्याचे फिर्यादीत नमूद केले आहे.