मोकाट जनावरांच्या मालकांवर कारवाई करणार : उपमुख्यमंत्री

बारामती, ता. १२ : आपले शहर स्वच्छ व सुंदर ठेवण्याची जबाबदारी आपलीच आहे, काही जण रस्त्यावर कचरा टाकत आहेत तर काही जनावरे शहरात लावलेल्या झाडांमध्ये जात नुकसान करत आहे, यात सुधारणा झाली नाही तर नाइलाजाने जनावरांच्या मालकांवरही कारवाई करावी लागेल, असा इशारा उपमुख्यमंत्री अजित पवार यांनी दिला.
शनिवारी (ता. १२) बारामतीत एका कार्यक्रमात बोलताना पवार यांनी संतप्त होत सुंदर बारामतीत कचरा टाकणाऱ्यांवर कारवाईचा इशारा दिला. शहर अधिकाधिक चांगले करण्याचा प्रयत्न करत असताना लावलेल्या झाडांचे नुकसान जनावरे करतात, त्यांना कोंडवाड्यात टाकले जाईलच पण हे असेच सुरु राहिले तर जनावरांच्या मालकांवरही कारवाईचा निर्णय घ्यावा लागेल. ज्यांच्या गाई किंवा गाढवे आहेत, त्यांनी आपापल्या दारात जनावरे बांधा, आम्ही बारामती चांगली करतो आहोत, ती कोणालाही कोठेही हिंडायला नाही, अशी तंबी त्यांनी दिली.
आपण चांगल्या गोष्टी बारामतीत करत आहोत पण काही जण रस्त्यांवर कचरा टाकतात, अशांनीही आपल्या सवयी बदलल्या पाहिजेत. काही ठिकाणी मुले चुकीच्या दिशेने गाडी चालवितात, अशा मुलांवरही कारवाई करायला हवी, तो कितीही मोठ्या बापाचा असला अगदी अजित पवार यांच्या जवळचा असला तरी सोडू नका अशा सूचनाच त्यांनी पोलिसांना दिल्या.