सहस्रचंद्र दर्शन सोहळ्यानिमित्त बारामतीत उपक्रमांचे आयोजन

बारामती, ता. १३ : अनेकांत एज्युकेशन सोसायटीचे अध्यक्ष व माजी नगराध्यक्ष जवाहर शहा (वाघोलीकर) यांच्या सहस्त्रचंद्रदर्शन सोहळ्यानिमित्ताने विविध विधायक उपक्रमांचे आयोजन केले आहे. सोहळा गौरव समितीचे अध्यक्ष मिलिंद शहा (वाघोलीकर) व सचिव प्राचार्य डॉ. अविनाश जगताप यांनी या बाबत माहिती दिली.
सोमवारी (ता. १४) तुळजाराम चतुरचंद महाविद्यालयाच्या जिवराज सभागृहाच्या आवारामध्ये रक्तदान शिबिराचे आयोजन करण्यात आले आहे. मंगळवारी (ता. १५) दुपारी चार वाजता जिवराज सभागृहामध्ये डॉ. हर्षवर्धन व्होरा यांचे, बुधवारी (ता. १६) दुपारी चार वाजता दंतरोगतज्ज्ञ डॉ. सौरभ दोशी यांचे, गुरुवारी (ता. १७) दुपारी चार वाजता डॉ. जे.जे. शहा व डॉ.सौ. अंबर्डेकर यांचे आरोग्यविषयक व्याख्यान होणार आहे.
१५ ते १८ जुलै दरम्यान दुपारी दोन ते चार या वेळेत कॉलेज ऑफ फार्मसीमध्ये सर्व महाविद्यालयीन सेवकांसाठी रक्त तपासणी, व ईसीजी परिक्षण होईल. रविवारी (ता. २०) महाविद्यालयीन सेवक, प्राध्यापकांसाठी वैद्यकीय तपासणी शिबिर होणार आहे. २३ जुलै रोजी महाविद्यालय परिसरात वृक्षारोपण होईल.
शनिवारी (ता. २६) जिवराज सभागृहामध्ये दुपारी चार वाजता जवाहर शहा (वाघोलीकर) ८१ व्या वर्षात पदार्पण करत असल्याबद्दल सहस्रचंद्र दर्शन सोहळ्याचे आयोजन करण्यात आले आहे. त्या वेळेस त्यांच्या जीवनकार्यावर आधारित गौरवग्रंथांचे प्रकाशन होणार असून त्यांची ग्रंथतुला केली जाणार आहे.

13114