‘नक्शा’ कार्यक्रमांतर्गत नगर भूमापन काम सुरु

बारामती, ता. १८ : ‘नक्शा’ कार्यक्रमांतर्गत नगरपालिका हद्दीतील मार्च २०२५ मध्ये सर्वे ऑफ इंडियाच्या माध्यमातून करण्यात आलेल्या ड्रोन सर्वेक्षणाची ओआरआय (ऑर्थो रेक्टिफाईड इमेज) प्राप्त झाली आहे. त्यानुसार नगरपालिका हद्दीतील बारामती, तांदुळवाडी, रुई व जळोची येथे ड्रोन सर्वेक्षण करून नगरपालिका हद्दीचे नगर भूमापनाचे काम १७ जुलै पासून करण्यात येणार असल्याची माहिती भूमी अभिलेख उपअधीक्षक संजय धोंगडे यांनी दिली.
नागरी स्थानिक स्वराज्य संस्था क्षेत्रातील मूळ व विस्तारित क्षेत्रामधील जमिनींची भौगोलिक माहिती प्रणाली (जीआयएस) आधारित सर्वेक्षण व भूमापन करण्याबाबत नक्शा हा कार्यक्रम केंद्र शासनाकडून एक वर्षाच्या प्रायोगिक तत्त्वावर बारामती येथे पथदर्शी स्वरूपात राबविण्यात येत आहे. याअंतर्गत नगरपालिका हद्दीतील नगर भूमापन करण्याबाबत जिल्हाधिकारी यांनी सोमवारी (ता. १४) जाहीर सूचना प्रसिद्ध केली आहे. याकामी उपअधीक्षक भूमि अभिलेख कार्यालयाचे कर्मचारी तसेच मोनार्च एजन्सी नगरपालिका प्रतिनिधी मिळकतींना प्रत्यक्ष भेट देऊन ग्राउंड ट्रुथिंग करणार असून त्यांना सहकार्य करावे, असे आवाहन धोंगडे यांनी केले आहे.

नक्शा प्रकल्पाचा⁠ होणारा लाभ
या सर्वेक्षणामुळे ⁠अभिलेखाचे जीआयएस आधारित नकाशे आणि मिळकत पत्रिका मिळण्यासोबतच⁠ ⁠मिळकतींचा नकाशा तयार होऊन त्यांचे क्षेत्र आणि अक्षांश-रेखांश सहित सीमा निश्‍चित होणार आहे. त्यामुळे त्यांच्या ⁠नागरी हक्कांचे संरक्षण होईल. ⁠मिळकत पत्रिकेच्या स्वरूपात अधिकार अभिलेख तयार झाल्यामुळे मिळकतींवर कर्ज घेण्याची सुविधा उपलब्ध होईल. तसेच ⁠मिळकतींबाबतचे न्यायालयीन दावे कमी होण्यास मदत होईल, असेही धोंगडे यांनी प्रसिद्धीपत्रकाद्वारे कळविले आहे.