हत्येप्रकरणी बारामतीत एकास जन्मठेप

बारामती, ता. २४ : किरकोळ कारणावरून मारहाण करून मृत्यूस कारणीभूत ठरल्याप्रकरणी येथील अतिरिक्त जिल्हा व सत्र न्यायाधीश बी. डी. शेळके यांनी आबासाहेब रामचंद गवारे (रा. गवारेफाटा, ता. बारामती) यास जन्मठेप व पाच हजारांचा दंड अशी शिक्षा ठोठावली आहे. गवारेफाटा येथे बाळासाहेब भानुदास गवारे यांच्या घरात घुसून किरकोळ कारणावरून लोखंडी गजाने मारहाण करून त्यांना आबासाहेब गवारे याने जखमी केले होते.
या मारहाणीमध्ये बाळासाहेब गवारे यांचा उपचार सुरू असताना मृत्यू झाला होता. याप्रकरणी बारामतीचे तत्कालीन पोलिस निरीक्षक नामदेव शिंदे यांनी न्यायालयात दोषारोपपत्र दाखल केले होते. ॲड. कमलाकर नवले यांनी सरकारी वकील म्हणून या खटल्यात १२ साक्षीदार तपासले. साक्षीदारांसह डॉक्टरांची साक्ष व पुरावा ग्राह्य धरत न्यायाधीशांनी आबासाहेब गवारे यास जन्मठेपेची शिक्षा ठोठावली. विद्यमान पोलिस निरीक्षक विलास नाळे, उपनिरीक्षक जी. के. कसपटे, उपनिरीक्षक एन. ए. नलवडे, पोलिस हवालदार उमा कोकरे, ॲड. आशिष खुंटे, ॲड. श्रीराम दंडवते यांनी खटल्यात सहकार्य केले.