बारामतीकरांचा उफाळला संताप

बारामती, ता. २८ : शहरातील खंडोबानगर चौकात रविवारी (ता. २७) झालेल्या अपघातात तिघांचा मृत्यू झाल्यानंतर नागरी समस्यांविषयी नागरिकांचा रोष उफाळून आला. प्रशासनाची उदासीनता व बेशिस्त वाहतुकीवर कारवाई होत नसल्याने नागरिकांनी संताप व्यक्त केला. त्यानंतर संध्याकाळी शहरातील वरिष्ठ प्रशासकीय अधिकाऱ्यांची तातडीची बैठक झाली. या मध्ये विविध उपाययोजना करण्यावर भर दिला गेला.
या अपघातानंतर बारामतीकरांनी समाजमाध्यमांसह परस्परसंवादादरम्यानही कमालीची हळहळ व्यक्त केली. चिमुकल्यांचा काहीही दोष नसताना त्यांना मृत्यूला सामोरे जावे लागले. मृत्यूपूर्वी अत्यंत आर्ततेने वडिलांनी ‘आपल्या मुलीला वाचवा’ म्हणत केलेली विनवणी अनेकांचे मन हेलावून गेली. यात तिघांचाही दुर्दैवी मृत्यू झाल्यावर काही तासातच ओंकार यांचे वडील राजेंद्र आचार्य यांच्या निधनानंतर बारामतीवर शोककळा पसरली होती.
विविध संघटना व संस्थांनीही या घटनेनंतर वाहतुकीला शिस्त लागावी व उपाययोजना व्हाव्यात, यासाठी प्रशासनाला निवेदन देत रोष व्यक्त केला.

या आहेत मागण्या....
• बारामतीतील अवजड वाहनांची वाहतूक शहराबाहेरून वळवावी
• अवजड वाहनांना शहरात वाहतुकीच्या वेळा ठरवून द्याव्यात.
• सर्व प्रमुख वर्दळीच्या चौकात तातडीने वाहतूक नियंत्रक दिवे बसवावेत
• प्रमुख चौकांमध्ये ट्रॅफिक पोलिस तैनात करावेत.
• चौकांसह अनेक रस्त्यांवर गतिरोधक करावेत.
• क्षमतेपेक्षा जास्त मालाची वाहतूक करणाऱ्या वाहनांवर कडक कारवाई करावी.
• नागरिकांच्या सूचनांची प्रशासनातील अधिकाऱ्यांनी दखल घ्यावी.
• सीसीटीव्ही कॅमेरे सर्व प्रमुख चौकातून बसवावेत.

बारामती शहर पोलिसांची वाहतूक शाखा वाहतुकीचे नियम रुजविण्यासाठी कारवाया करत आहे. अपघातातील मृत्यूमुखी पडणाऱ्यांचे प्रमाण चिंताजनक आहे. पोलिसांची कारवाई नियमितपणे सुरुच असेल. नागरिकांनीही नियमांचे पालन करावे.
- गणेश बिरादार, अतिरिक्त पोलिस अधीक्षक, बारामती

या पुढील काळात वाहतुकीला शिस्त लावण्यासह नागरिकांच्या सुरक्षिततेला प्राधान्य दिले जाणार आहे. ओव्हरलोड वाहनांवर कारवाई केली जाईल. नागरिकांचे प्रबोधनही करण्याचा प्रयत्न होईल.
- सुदर्शन राठोड, उपविभागीय पोलिस अधिकारी, बारामती

बारामतीतील वाहतुकीच्या नियमांचे उल्लंघन करणाऱ्या वाहनचालक व मालकांवर कठोर कारवाई सुरुच राहणार आहे. लोकांची सुरक्षितता महत्त्वाची आहे, त्या दृष्टीने सातत्यपूर्ण कारवाई होणार आहे.
- चंद्रशेखर यादव, पोलिस निरिक्षक, वाहतूक शाखा, बारामती.