बारामतीत प्रशासन ॲक्शन मोडवर

बारामती, ता. २९ : शहरातील वाहतुकीला शिस्त लावण्यासह अपघात रोखण्यासाठी बारामतीत प्रशासन आता ॲक्शन मोडवर आले आहे. सर्व विभागाच्या अधिकाऱ्यांनी संयुक्तपणे विविध उपाययोजना करण्यासाठी प्रयत्न सुरू केल्याची माहिती उपविभागीय अधिकारी वैभव नावडकर यांनी दिली.
बारामतीत रविवारी (ता. २७) खंडोबानगर येथे झालेल्या अपघातात वडील व दोन मुलींचा मृत्यू झाल्यानंतर प्रशासनाला नागरिकांच्या रोषाला सामोरे जावे लागले होते. त्यानंतर अधिकाऱ्यांनी तातडीने बैठका घेत उपाययोजना करण्यास प्रारंभ केला आहे. मंगळवारी (ता. २९) बारामतीत पत्रकार परिषद घेत प्रशासनाने उपाययोजनांबाबत माहिती दिली.
यावेळी मुख्याधिकारी पंकज भुसे, पोलिस निरिक्षक चंद्रशेखर यादव व विलास नाळे यांच्यासह उपप्रादेशिक परिवहन विभाग व सार्वजनिक बांधकाम विभागाचे अधिकारी उपस्थित होते.
यावेळी नावडकर म्हणाले, ‘‘नागरिकांनी गेल्या दोन दिवसात अनेक निवेदने दिली आहेत. त्याचा अभ्यास सुरू आहे. गर्दीची ठिकाणे, शाळा व इतर वर्दळीच्या जागा निश्चित करून तेथे उपाययोजना करणार आहोत. जेथे गतिरोधकांची गरज आहे, तेथे ते टाकले जातील. मुख्य रस्त्याला मिळणाऱ्या अंतर्गत रस्त्यांवर मागणीनुसार गतिरोधक टाकले जाणार आहेत. बांधकाम साहित्याची वाहतूक करणाऱ्या अवजड वाहनांना सकाळी सात ते रात्री नऊपर्यंत शहरात येता येणार नाही.’’
पोलिस निरिक्षक यादव म्हणाले, ‘‘वाहतूक व्यवस्थापन समिती तयार करून त्यानुसार उपाययोजना केल्या जातील. शहरात फलक लावले जातील. ३५ ठिकाणे निश्चित केलेली असून, तेथे उपाययोजना प्रशासन करेल.’’

पाच वर्षात ५४ जणांचा बळी
बारामती शहरातील रस्त्यांवर सन २०२१ पासून आतापर्यंत ५४ जणांचा मृत्यू झाला आहे. २०२१- १२, २०२२- १५, २०२३- १२, २०२४- ५, २०२५- १० अशी रस्त्यावर मृत्यूमुखी पडलेल्यांची संख्या आहे. हे मृत्यू रोखण्याचा प्रशासनाचा प्रयत्न आहे.

या उपाययोजना केल्या जाणार
सकाळी सात ते रात्री नऊपर्यंत बांधकाम साहित्याच्या अवजड वाहनांना शहरात बंदी घालणार.
नागरिकांच्या निवेदनानुसार ३५ ठिकाणे निश्चित केलेली असून, तेथे उपाययोजना करणार.
नागरिकांच्या मागणीनुसार आवश्यकतेनुसार गतिरोधक टाकणार.
वाहतूक व्यवस्थापन समितीची स्थापना करून उपाययोजना करणार.
स्कूल बस व रिक्षाचालक संघटनांशी चर्चा करून निर्णय घेणार.
रिक्षा थांबे निश्चित करणार.
सेव्ह लाइफ फाउंडेशनच्या मदतीने अभ्यास करून काही बदल करणार.
शहरात विविध ठिकाणी दिशादर्शक फलक बसविणार.
गती निश्चितीचेही फलक लावणार.