अवजड वाहनांसाठी बारामतीत स्वतंत्र मार्ग

बारामती, ता. ३१ : शहरात घडलेल्या दुर्दैवी अपघातानंतर नागरिकांच्या दबावामुळे बांधकामाशी संबंधित टिपर, हायवा, डंपर अशा स्वरूपाच्या जड वाहतुकीला सकाळी सात ते रात्री नऊ वाजेपर्यंत बारामती शहरात बंदी घालण्यात आली आहे.
बारामती शहर पोलिस ठाण्याचे वाहतूक विभागाचे पोलिस निरिक्षक चंद्रशेखर यादव यांनी गुरुवारी (ता.३१) याबाबतचे आदेश जारी केले.
या नवीन नियमानुसार खडी, क्रश, सँड, वाळू, माती व मुरूम वाहतूक करणारे ट्रक, हायवा, टिपर, डंपर अशा अवजड वाहनांवर दिवसा शहरातून वाहतुकीची बंदी घालण्यात आली आहे. दरम्यान गौण खनिजाची वाहतूक करणारे डंपर, ट्रक, हायवा, टिपर ही वाहने सोडून इतर अवजड वाहनांना रस्ते निश्चित करून देण्यात आले असून, त्यांना याच रस्त्याने वाहतूक करावी लागणार आहे.
वाहनचालक व मालकांनाही सूचना देण्याची प्रक्रीया सुरु करण्यात आली असून, शहरातही पोलिस व नगरपरिषदेच्या वतीने रिक्षा फिरवून वाहतूक सुरळीत राहण्यासाठी जनजागृती सुरवात झाली आहे.

अवजड वाहनांच्या मार्गातील बदल
भिगवण, पाटस, एमआयडीसीतून येणारी सर्व अवजड वाहने गदिमा रोड- जळोची- पिंपळी- इंदापूर रस्त्याने मार्केट यार्डसमोरून बाहेर पडतील. फलटण बाजूकडून येणारी अवजड वाहने नीलम पॅलेस चौक, शिवाजी चौकातून शाहू महाराज चौक मार्गे वाबळे हॉस्पिटलकडून बाहेर पडतील. नीरा रस्त्याने आलेली अवजड वाहने महालक्ष्मी शोरूम- कारभारी सर्कल मार्गे फलटण चौक, शिवाजी चौकातून शाहू चौक व वाबळे हॉस्पिटलमार्गे इंदापूर रस्त्याने बाहेर पडतील.
मोरगाव रस्त्याने आलेली अवजड वाहने महात्मा फुले चौक- कारभारी सर्कल, फलटण चौक, शिवाजी चौकातून वाबळे हॉस्पिटलमार्गे इंदापूर रस्त्याने बाहेर पडतील.