खुनाच्या प्रयत्नाप्रकरणी दहा वर्षांची सक्तमजुरी

बारामती, ता. २ : येथील अतिरिक्त व जिल्हा सत्र न्यायाधीश एस.आर. पाटील यांनी सोनू नामदेव शेटे (वय ३५, रा. जगदाळेवस्ती, लिंगाळी, ता. दौंड) यास खूनाचा प्रयत्न केल्याप्रकरणी १० वर्षांची सक्तमजुरी व २० हजारांच्या दंडाची शिक्षा ठोठावली आहे.
या प्रकरणी सुमीत रवींद्र कांबळे (रा. लिंगाळी, ता. दौंड) यांनी दौंड पोलिस ठाण्यात फिर्याद दिली होती. सोनू याचा चारचाकी वाहने भाडेतत्त्वावर देण्याचा व्यवसाय होता. कांबळे यांनी सोनू याच्याकडून वाहन भाडेतत्त्वावर घेतले होती. त्यात बिघाड झाल्यानंतर बिल देण्यावरून या दोघांत बाचाबाची झाली होती. सोनू याने २२ ऑक्टोबर २०१९ मध्ये कांबळे यांच्यावर दवाखान्यात जात असताना गोळ्या मारुन त्यांना ठार करण्याचा प्रयत्न केल्याचे फिर्यादीत नमूद केले होते. या प्रकरणी पोलिस निरिक्षक सुनील महाडीक यांनी तपास करून दोषारोपपत्र दाखल केले होते.
जिल्हा सरकारी वकील ॲड. प्रसन्न जोशी यांनी १५ साक्षीदार तपासले. गुन्ह्यात वापरलेला गावठी कट्टा व कांबळे यांच्या शरीरातून काढलेली गोळी याचे विश्‍लेषण महत्त्वाचे ठरले. पुरावा व युक्तिवाद मान्य करत न्यायालयाने सोनू शेटे यास १० वर्षे सक्तमजुरीची शिक्षा ठोठावली. न्यायालयीन पैरवी अधिकारी नामदेव नलवडे व पोलिस हवालदार मनीषा अहिवळे यांनी सहकार्य केले.