बेशिस्त वाहनचालकांमुळे कोंडी

बारामती, ता. ७ : शहरातील गर्दीच्या ठिकाणी मनमानी पद्धतीने चार चाकी आणि दुचाकी वाहने लावली जातात. त्यातच बेशिस्त वाहनचालकांमुळे वाहतुकीच्या कोंडीची समस्या उद्‍भवते आहे.
खंडोबानगर येथे झालेल्या अपघातानंतर नागरिकांनी पोलिस, नगरपरिषद आणि इतर प्रशासकीय अधिकाऱ्यांना धारेवर धरले होते. अनेक गोष्टींमध्ये प्रशासनाकडून दिरंगाई झाली ही वस्तुस्थिती होती. असे असले तरी अनेक ठिकाणी काही ठराविक जणांमुळे कोंडीचा सामना करावा लागतो. याकडेही काही जागरूक नागरिकांनी लक्ष वेधले आहे.
बारामती शहरातील भिगवण रस्त्यावरील सेवा रस्ता, पंचायत समितीचा चौक, न्यायालय परिसर, सम्यक चौक, कारभारी सर्कल, खंडोबानगरचा काही भाग, सरकारी दवाखान्यासमोरील परिसर, प्रशासकीय भवनसमोरील रस्ता, रिंगरोडचा काही भाग अशा अनेक ठिकाणी वाहनचालक मन मानेल तशी गाडी लावून निघून जातात. या बेशिस्त वाहनचालकांवर कठोर कारवाईची गरजेची आहे. बिनधास्त हवी तेथे गाडी लावून निघून जाणाऱ्या वाहनचालकावर दंडात्मक कारवाई करत न्यायालयात खटले पाठविण्याची मागणी बारामतीकर करीत आहेत.

नागरिकांचे सहकार्य महत्त्वाचे
प्रशासन त्यांचे काम करत असताना नागरिकांनी जर नियमांचे पालन केले तर वाहतुकीची समस्या आपोआपच कमी होणार आहे. गरज नसले तेव्हा चार चाकी वाहन रस्त्यावर आणू नये, ही बाब जर बारामतीकरांनी अंमलात आणली तर वाहतूक कोंडीचा प्रश्‍न कमी होऊ शकतो.

वर्दळीचे रस्ते सुस्थितीत असावे
अनेक वर्दळीच्या रस्त्यांवर आणि चौकात अतिक्रमणे आहेत. ती प्रशासनाने कायमस्वरूपी हटविणे गरजेचे आहे. काही ठराविक लोकांच्या या अतिक्रमणाने चालायला जागाच नाही अशी स्थिती आहे. नगरपरिषद आणि सार्वजनिक बांधकाम विभागाने खड्डे, चाऱ्या बुजवून रस्ता नीट केला तर वाहतूक मंदावणार नाही, अशी नागरिकांची सूचना आहे.

नागरिकांनी आपली वाहने व्यवस्थित ठिकाणी लावावीत. वेगाची मर्यादा, मोबाईलवर बोलणे या बाबी टाळाव्यात. नियम मोडणाऱ्या नागरिकांवर प्रशासनाने कारवाई केलीच पाहिजे. मात्र प्रशासनाने त्यांचीही जबाबदारी पार पाडायला हवी.
- ॲड. राहुल शिंदे, स्थानिक