दुचाकींच्या क्रमांकासाठी बारामतीत नवीन मालिका

बारामती, ता. ७ : खासगी संवर्गातील दुचाकी वाहनांसाठी बारामती उप प्रादेशिक परिवहन कार्यालय येथे ‘एमएच 42 बीटी’ या क्रमांकाची नवीन मालिका सुरु करण्यात येणार असून, आकर्षक क्रमांक राखून ठेवण्यासाठी अर्ज करण्याचे आवाहन केले आहे.
ज्या खासगी चारचाकी वाहनांसाठी आकर्षक, तसेच पसंतीचा क्रमांक हवा असेल त्यांनी १२ ऑगस्ट रोजी सकाळी १०.३० ते दुपारी २.३० वाजेच्यादरम्यान धनाकर्षासह (डी.डी.) विहित नमुन्यात अर्ज करावा. एकाच क्रमांकाकरीता एकापेक्षा जास्त अर्ज आल्यास त्यांची यादी १२ ऑगस्ट रोजी सायंकाळी ५ वाजता कार्यालयीन सूचना फलकावर लावण्यात येईल.
यादीतील अर्जदारांना लिलावासाठी जास्त रकमेचा डी.डी. जमा करावयाचा असेल त्यांनी १३ ऑगस्ट रोजी दुपारी ३.३० वाजेपर्यत सीलबंद पाकिटात कार्यालयात जमा करावा. त्याच दिवशी दुपारी ४ वाजता संबंधित अर्जदारांसमोर लिफाफे उघडून विनिर्दिष्ट शुल्कापेक्षा जास्तीत जास्त रक्कमेचा धनाकर्ष भरलेल्या व्यक्तीस नमूद पसंती क्रमांक वितरित केला जाणार आहे. १३ ऑगस्ट रोजी केवळ दुचाकी वाहनांकरिता आकर्षक, तसेच पसंती क्रमांकांचे विहित शुल्कासह अर्ज सकाळी १०.३० ते दुपारी २.३० वाजेपर्यंत स्वीकारले जाईल. एकाच क्रमांकाकरीता अधिक अर्ज आल्यास त्यांची यादी १४ ऑगस्ट रोजी सकाळी १०.३० वाजेपर्यंत सूचना फलकावर लावण्यात येईल. एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखीव ठेवण्यासाठी प्रदान केलेले शुल्क परत करता येणार नसल्याचे उप प्रादेशिक परिवहन अधिकारी सुरेंद्र निकम यांनी कळविले आहे.