बेशिस्त बारामतीकरांना लागतेय शिस्त

बारामती, ता. 9 : शहरातील खंडोबानगर येथे झालेल्या अपघातात तीन जणांचा दुर्दैवी अंत झाल्यानंतर बारामतीचे सामाजिक वातावरण ढवळून निघाले आहे. एका दुर्दैवी घटनेनंतर बारामतीकर आता आवाज उठवण्यास सुरुवात केल्याने प्रशासनही त्याची दखल घेत असल्याने बेशिस्त बारामतीकरांना हळूहळू का होईना शिस्त लागण्यास सुरुवात झाली आहे.
काही जागरूक नागरिकांनी पुढे येत अपघातमुक्त बारामतीचा नारा देत एक व्हॉटसअँप ग्रुप स्थापन केला. या ग्रुपमध्ये सर्वच प्रमुख अधिका-यांना सहभागी करून घेण्यात आले आहे. नागरिक व प्रशासन यांच्यात दुवा साधण्याच्या दृष्टीने अनेक बाबींची चर्चा या निमित्ताने सुरू झाली आहे. एक हजारांपेक्षा बारामतीकर या ग्रुपमध्ये असल्याने बेशिस्त वाहनचालकांचे लाइव्ह फोटोच या ग्रुपवर येऊ लागले आहेत. वाहतुकीचे नियम मोडणा-यांच्या वाहनांच्या क्रमांकासह माहिती पोलिसांपर्यंत येऊ लागल्याने पोलिसांकडूनही दंडात्मक कारवाई सुरू झाली झाली आहे. साध्या वेशातील पोलिसांची भूमिका अनेक नागरिक या निमित्ताने बजावू लागल्याने बारामतीत मन मानेल तेथे वाहन लावून जाणे आता खिशाला न परवडणारे ठरू लागले आहे. अनेक वाहनचालकांवर दंडात्मक कारवाई होऊ लागल्याने काही ठिकाणी वाहने लावण्याचे प्रमाण कमी होऊ लागले आहे. वाहतुकीची होणारी कोंडी, निकृष्ट दर्जाचे काम, चुकीच्या पद्धतीने होणारे पार्किंग यासह सामाजिक विषयांवर नागरिकांना व्यक्त होण्यासाठी व्यासपीठ मिळू लागल्याने आता बारामतीकर व्यक्त होऊ लागले आहेत. त्याची दखल प्रशासकीय स्तरावर घेतली जात असल्यानेही फरक हळूहळू जाणवू लागला आहे. मन मानेल तेथे पार्किंग आता परवडणारे नसल्याने नागरिकही आता पार्किंग असेल त्या ठिकाणीच आपली वाहने लावत शिस्तीचे दर्शन घडवीत आहेत.