कृषीपंपासाठी सिंगल फेज वीज वापरू नका

बारामती, ता. १२ : वाडी- वस्तीवर राहणाऱ्या घरगुती ग्राहकांना वीजपुरवठा उपलब्ध व्हावा, या हेतूने कृषी फिडरवरून २४ तास सिंगल फेज वीजपुरवठा दिला जातो. या कृषी फिडरवरील कृषी ग्राहक शेतीपंपासाठी सिंगल फेज वीजपुरवठा वापरत असल्याचे निदर्शनास आले आहे. हा वापर हा अनधिकृत असून, शेतीपंपासाठी सिंगल फेज वीजपुरवठा वापरू नये, असे महावितरणने आवाहन केले आहे.
या संदर्भात दिलेल्या प्रसिद्धिपत्रकात नमूद केले आहे की, महाराष्ट्र विद्युत नियामक आयोगाच्या निर्देशानुसार शेतीपंपासाठी त्या- त्या भागासाठीच्या निर्धारित वेळापत्रकानुसार दिवसा व रात्री चक्राकार पद्धतीने आठ तास थ्री फेज वीजपुरवठा केला जातो. कृषी ग्राहकांनी निर्धारित वेळापत्रकानुसार उपलब्ध वीजपुरवठा शेतीपंपासाठी वापरणे अपेक्षित आहे.मात्र, काही कृषी ग्राहक शेती फिडरवरील २४ तास उपलब्ध सिंगल फेज वीजपुरवठ्याचा वापर शेतीपंपासाठी करीत असल्याचे महावितरणच्या निदर्शनास आले आहे. सिंगल फेज वीजपुरवठा शेतीपंपासाठी वापरला जात असल्याने सदरील रोहित्रे अतिभारीत होत आहेत. परिणामी शेतात, वाड्या- वस्त्यांवर राहणाऱ्या शेती फिडरवरील घरगुती ग्राहकांचा वीजपुरवठा बाधित होत आहे. कृषी ग्राहकांनी तातडीने शेती पंपासाठी सिंगल फेज वीजपुरवठा वापरणे बंद करावे. यापुढे शेती पंपासाठी सिंगल फेज वीजपुरवठा वापरत असल्याचे निदर्शनास आल्यास महावितरणकडून कारवाई करण्यात येईल, असा इशारा देण्यात आला आहे.