कटफळ रेल्वे फाटक बंद न करण्याची ग्रामस्थांची मागणी

बारामती, ता. १२ : येथील एमआयडीसी मधील विमानतळानजीक असलेले रेल्वे फाटक कायमस्वरूपी बंद करू नये, अशी मागणी सावंतवाडी गोजुबावी, तांदूळवाडी, उंडवडी, कटफळ आदी ग्रामस्थांनी रेल्वे प्रशासनाकडे केली आहे.
रेल्वे रूळ ओलांडून कटफळ चौकाकडून विमानतळ, सावंतवाडी गोजुबावी, तांदूळवाडी, उंडवडी परिसरात जाता येते. दुसऱ्या बाजूने एमआयडीसीमधील विविध कंपन्यांसह कटफळ, वंजारवाडी परिसरात जाता येते. बारामती एमआयडीसीमधून संत तुकाराम महाराज पालखी मार्गावरील उड्डाण पुलाचे काम पूर्ण झाल्याने कटफळ रेल्वे फाटक कायमस्वरूपी बंद करण्याचा निर्णय रेल्वे प्रशासनाने घेतला आहे.
उड्डाणपूल वापरल्यास पाच किलोमीटर अंतर जास्त होते. यात इंधन व वेळेचा अपव्यय होत असल्याने हे फाटक बंद करू नये, अशी नागरिकांची मागणी आहे. हे गेट फाटक बंद केल्याने व्यावसायिकांसह विद्यार्थ्यांवरही परिणाम होणार आहे. त्यामुळे या निर्णयाचा फेरविचार करण्याची मागणी ग्रामस्थांनी केली आहे. या निर्णयाविरोधात आंदोलनाचा इशाराही नागरिकांनी दिला आहे.