अवजड वाहनांच्या बंदीवर प्रशासन घेणार अंतिम निर्णय

बारामती, ता. १२ : उपविभागीय अधिकारी वैभव नावडकर यांनी बोलाविलेल्या बैठकीत शहरात बांधकाम व्यावसायिकांच्या अवजड वाहनांवर घालण्यात आलेली वेळेची मर्यादा कमी करण्याची मागणी बांधकाम व्यावसायिकांसह टिपर वाहतूक संघटनेच्या सदस्यांनी मंगळवारी (ता. १२) केली. मात्र, लावण्यात आलेले निर्बंध कायम ठेवावेत, अशी आग्रही भूमिका नागरिकांनी मांडली. दोन्ही बाजू ऐकून घेतल्यानंतर प्रशासन एकत्र बसून सर्व परिस्थितीचा विचार करून या बाबत निर्णय घेणार आहे. अद्याप या बाबत कोणताही अंतिम निर्णय प्रशासनाने घेतलेला नाही.
या बैठकीस वैभव नावडकर यांच्यासह अतिरिक्त पोलिस अधीक्षक गणेश बिरादार, मुख्याधिकारी पंकज भुसे, तहसीलदार गणेश शिंदे, पोलिस निरिक्षक चंद्रशेखर यादव व विलास नाळे यांच्यासह क्रेडाई व बिल्डर असोसिएशनचे पदाधिकारी व सामाजिक कार्यकर्ते उपस्थित होते.
गर्दीची वेळ वगळता सकाळी ११ ते दुपारी चारपर्यंत वाहतुकीस परवानगी देण्याची मागणी बांधकाम व्यावसायिक वाहतूकदारांनी केली. सर्व नियमांचे व वेगमर्यादेचे पालन करूनच ही वाहतूक होईल, अशी ग्वाहीही देण्यात आली. नागरिकांनी मात्र सकाळी सात ते रात्री नऊपर्यंत शहरात या वाहनांना बंदी असावी, अशी भूमिका मांडली.