बारामतीत उद्या ‘सायक्लोथॉन’

बारामती, ता. २२ : फिट इंडिया मिशन अंतर्गत पुणे ग्रामीण पोलिस दलाच्या वतीने, तसेच बारामती सायकल क्लब व बारामती नगरपरिषदेच्या सहकार्याने रविवारी (ता. २४) बारामतीत सकाळी सव्वा सहा वाजता सायक्लोथॉनचे आयोजन केल्याची माहिती अतिरिक्त पोलिस अधीक्षक गणेश बिरादार, उपविभागीय पोलिस अधिकारी सुदर्शन राठोड, पोलिस निरिक्षक विलास नाळे, वैशाली पाटील व चंद्रशेखर यादव यांनी दिली.
सायक्लोथॉन अंतर्गत शारदा प्रांगणापासून सायकल फेरीस प्रारंभ होणार असून, ही सायकल फेरी इंदापूर चौकातून गुनवडी चौक, गांधी चौकातून भिगवण चौकातून पेन्सिल चौकापर्यंत जाणार आहे. त्यानंतर गदिमाला फेरी घालून परत पेन्सिल चौकामार्गे शारदा प्रांगणात समाप्त होणार आहे.
या प्रसंगी पुणे जिल्हा पोलिस अधीक्षक संदीपसिंह गिल यांच्यासह बारामती शहरातील सर्व वरिष्ठ अधिकारी उपस्थित राहणार आहेत. या सायकल फेरीमध्ये शक्ती अभियानाअंतर्गत पोस्को कायदा, अमली पदार्थांविषयी जनजागृती केली जाणार आहे. या सायकल फेरीस सर्वांनी उपस्थित राहावे, असे आवाहन केले आहे.