बारामतीत रुग्णालयातच मिळणार आता रक्त

बारामती, ता. २३ : येथील इंडियन रेडक्रॉस सोसायटी संचलित स्व. माणिकबाई चंदुलाल सराफ ब्लड सेंटर तर्फे रुग्णसेवेसाठी एक अभिनव सेवा सुरू करण्यात आली आहे. या उपक्रमाअंतर्गत रुग्णालयातून रक्ताचा नमुना घेत रक्तपेढीच्या वतीने संबंधित रुग्णालयातच आवश्यक रक्त पोहोचविण्याची सुविधा उपलब्ध करून देण्यात आली आहे. याबाबत संस्थेचे सचिव डॉ. महेंद्र दोशी व कार्यकारिणी संचालक डॉ. अशोक तांबे यांनी माहिती दिली.
या सेवेची नुकतीच अधिकृत घोषणा करण्यात आली. या उपक्रमामुळे रुग्णालयात दाखल रुग्ण व नातेवाइकांना दिलासा मिळणार आहे. यापूर्वी नातेवाइकांना रक्त घेण्यासाठी ब्लड सेंटरवर येऊन प्रक्रिया पूर्ण करावी लागत होती, यात वेळ आणि श्रम वाया जात होते. डॉ. महेंद्र दोशी व डॉ. अशोक तांबे यांनी या सुविधेचा रुग्ण व नातेवाइकांना उपयोग होईल, त्यांचा वेळ वाचेल, अशी अपेक्षा व्यक्त केली. नवनिर्वाचित सचिव डॉ. महेंद्र दोशी यांचे स्वागत तर ४० वर्षे सेवा बजावलेल्या डॉ. अशोक दोशी यांचा सत्कार करण्यात आला. उपाध्यक्ष किशोर शहा, खजिनदार मिलिंद शहा, कार्यकारिणी संचालक डॉ. अशोक तांबे, डॉ. हर्षवर्धन व्होरा, डॉ. स्नेहलता पवार, रोहित शहा उपस्थित होते. या सेवेसाठी ०२११२-२२२९५१ आणि जनसंपर्क अधिकारी सोमनाथ कवडे यांचा मोबाईल क्रमांक ९०९६३८३९५९ यावर संपर्क साधण्याचे आवाहन करण्यात आले आहे.

३४३३