रस्त्यांचे काँक्रिटीकरण करण्याची मागणी

बारामती, ता. २६ : शहरातील साठेनगर, प्रबुद्ध नगर, वडके नगर व आमराई परिसरातील रस्त्यांची अतिशय दुरवस्था झाली असून, नागरिक व शालेय मुलांना दररोज मोठ्या अडचणींना सामोरे जावे लागत आहे. पावसाळ्यात पाणी साचून खड्डे निर्माण झाल्याने नागरिकांच्या आरोग्याला व सुरक्षिततेला धोका निर्माण झाला आहे. या पार्श्वभूमीवर वंचित बहुजन युवा आघाडीचे जिल्हाध्यक्ष मंगलदास निकाळजे यांनी नगरपरिषदेला निवेदन देत या रस्त्यांचे व अंतर्गत बोळीमधील तत्काळ काँक्रिटीकरण करण्याची मागणी केली आहे. अंतर्गत रस्त्यांची परिस्थिती बिकट झाली आहे. त्यातून नागरिक, ज्येष्ठ नागरिक व विद्यार्थ्यांना त्रास सहन करावा लागतो आहे. तसेच साचलेल्या पाण्यामुळे मलेरिया, डेंगी व इतर साथीच्या रोगांचा प्रसार होण्याची शक्यता वाढली आहे.