बारामतीला मुसळधार पावसाने झोडपले

बारामती, ता. २९ : मुसळधार पावसाने शुक्रवारी (ता.२९) बारामती शहरास झोडपून काढले. दुपारपर्यंत तुरळक पाऊस होता, संध्याकाळनंतर मात्र पावसाच्या जोरदार सरी बारामती शहर व परिसरात कोसळल्या.
या पावसाने शहराच्या सखल भागात जागोजागी पाणी साचले होते. तर रस्त्यांवरून पाणी वाहत होते. पावसाचा अंदाज न आल्याने पुरेशा तयारीने निघालेले नसल्याने अनेक बारामतीकर या पावसात चिंब भिजले. संध्याकाळी पावसाचा जोर वाढल्यानंतर शहरातील रस्त्यांना तळ्याचे स्वरूप प्राप्त झाले होते. अनेक दिवसानंतर बारामतीला दमदार पाऊस झाला. शाळेतून घरी जाणारे विद्यार्थी व पालक, कामावरून घरी जाणारे कर्मचारी या पावसात अडकल्याने भिजून गेले. पावसाचा जोर कमी होत नसल्याने अनेकांनी भिजत घर गाठले. शहरातील अनेक ठिकाणी पावसाने रस्त्यांवर खड्डे पडलेले असून पाऊस थांबल्यानंतर रस्ते व खड्ड्यांची डागडुजी करून घेण्याची नागरिकांची मागणी आहे.

कामे केल्यानंतर खड्डे बुजविलेच जात नाहीत...
शहरात अनेक ठिकाणी विविध कामानिमित्त खड्डे व चाऱ्या खोदल्या जातात, काम झाल्यानंतर कसे तरी खड्डे बुजविले जातात, प्रत्यक्षात थोडा पाऊस झाला की तेथे खड्डे पडतात. अनेक ठिकाणी खोदून ठेवलेल्या खड्ड्यांचे डांबरीकरणच केले जात नाही, नगरपरिषद नुकसान भरपाई घेऊन खोदाईची परवानगी देते, प्रत्यक्षात या नुकसानभरपाईच्या रकमेतून कधीच डांबरीकरण केले जात नाही, त्यामुळे खोदून ठेवलेल्या
चाऱ्यातून लोकांना धक्के खात जावे लागते.

3483