बिहारच्या अधिकाऱ्यांचा बारामती अभ्यास दौरा

बारामती, ता. ३ : बिहारमधील सहकार विभागातील ३० उच्चपदस्थ अधिकाऱ्यांनी नुकताच बारामतीचा दौरा केला. पश्चिम महाराष्ट्रातील सहकाराची वाटचाल, येथील कामकाज व कार्यपद्धती यांचा अभ्यास करण्यासाठी हे अधिकारी बारामतीत आले होते.
बारामती तालुका खरेदी विक्री संघाच्या सर्व शाखांची, तसेच औषध दुकान, पेट्रोलपंप व इतर उपक्रमांची माहिती त्यांनी घेतली. उपमुख्यमंत्री अजित पवार यांच्या नेतृत्वाखाली खरेदी- विक्री संघाची वाटचाल सुरू असल्याची माहिती संघाचे अध्यक्ष ॲड. रवींद्र माने, उपाध्यक्ष नितीन देवकाते व व्यवस्थापक नीलेश लोणकर यांच्यासह संचालक मंडळातील सदस्यांनी दिली. वार्षिक १५० कोटी रुपयांची उलाढाल येथे होत असून, सहकारी तत्त्वावर शेतकऱ्यांना मदतीचा हात दिला जातो, असेही त्यांनी नमूद केले.
बारामतीचा झालेला सर्वांगिण विकास पाहून बिहारचे अधिकारी अचंबित झाले होते. एक स्मार्ट सिटी कशी असावी याचे उत्तम उदाहरण म्हणून बारामतीकडे पाहिले पाहिजे, अशी प्रतिक्रिया या अधिकाऱ्यांनी व्यक्त केली.
पुण्याच्या वैकुंठ मेहता राष्ट्रीय सहकारी प्रबंध संस्थेच्या वतीने डॉ. शंतनू घोष यांनी या दौऱ्याचे आयोजन केले होते. या प्रसंगी उपमुख्यमंत्र्यांचे विशेष कार्यकारी अधिकारी सचिन यादव, स्वीय सहायक बाळराजे मुळीक, सहकारचे सहायक निबंधक प्रमोद दुरगुडे, संघाचे संचालक शिवाजीराव टेंगले, दत्तात्रेय आवळे, विक्रम भोसले, संभाजी जगताप, ज्ञानदेव नाळे, रमेश देवकाते, सोनाली जायपत्रे, अशोक जगताप, लक्ष्मण जगताप, उदयसिंह धुमाळ, विजय शिंदे, बाबूराव चव्हाण आदी उपस्थित होते.

46540