वीजचोरीप्रकरणी ५७ जणांवर गुन्हे

बारामती, ता. ४ : महावितरणच्या बारामती परिमंडळात टीओडी मीटरमध्ये छेडछाडीची ५७ प्रकरणे उघडकीस आली आहेत. या प्रकरणी संबंधित ग्राहकांवर वीजचोरीची कारवाई केली आहे. वीजचोरी कायद्याने गुन्हा असून, ग्राहकांनी कुठल्याही क्षणिक आर्थिक आमिषाला बळी पडून वीजमीटरमध्ये छेडछाड करू नये, अन्यथा कायदेशीर कारवाई केली जाईल, असा इशारा महावितरणने दिला आहे.
महावितरणकडून अत्याधुनिक टीओडी (टाइम ऑफ डे) मीटर ग्राहकांना बसविले जात आहेत. टीओडी मीटर हे थेट महावितरणच्या नेटवर्क सर्व्हरला जोडलेले असल्याने या मीटरमध्ये छेडछाड केल्यास, मीटर नादुरूस्त झाल्यास महावितरणकडे तत्काळ त्याच क्षणी माहिती उपलब्ध होते. ज्या टीओडी मीटरमध्ये छेडछाड केल्याच्या नोंदी महावितरणकडे उपलब्ध झाल्या आहेत. त्या मीटरची प्रत्यक्ष पडताळणी करून बारामती परिमंडळातील ५७ ग्राहकांवर कारवाई करण्यात आली आहे. यात बारामती मंडळातील २६, सोलापूर २१, सातारा मंडळातील १० ग्राहकांचा समावेश आहे.
वीजमीटरमध्ये छेडछाड करून, वीज वाहिन्यांवर आकडे टाकून वा अन्य मार्गाद्वारे वीजचोरी करणे हा फौजदारी गुन्हा आहे. त्यात सहा पट आर्थिक दंड व ६ महिने ते पाच वर्षांपर्यंतच्या तुरुंगवासाच्या शिक्षेची तरतूद आहे. ग्राहकांनी वीजचोरी करू नये, असे आवाहन महावितरणने केले आहे.