पत्नीच्या खूनप्रकरणी पतीस जन्मठेपेची शिक्षा

बारामती, ता. १० : अंगावर पेट्रोल टाकून पेटवून देत पत्नीचा खून केल्याप्रकरणी बाबासाहेब ऊर्फ बाळासाहेब निवृत्ती हेगडे (रा.लिंगमळा, ता. दौंड) यास येथील जिल्हा न्यायाधीश बी.डी. शेळके यांनी जन्मठेप व पाच हजार रुपये दंडाची शिक्षा ठोठावली. दारू पिण्यासाठी पैसे न दिल्याच्या कारणावरून पत्नीच्या अंगावर पेट्रोल टाकून तिला पेटवून दिल्याने त्यात भाजून पत्नीचा मृत्यू झाला होता. या प्रकरणी विशेष सरकारी वकील ॲड. कमलाकर नवले यांनी या खटल्यामध्ये आठ साक्षीदार तपासले. या खटल्यामध्ये मुलगा व सून यांची साक्ष महत्त्वाची ठरली. या साक्षी व युक्तिवाद ग्राह्य धरुन न्यायालयाने बाळासाहेब हेगडे यास जन्मठेपेची शिक्षा ठोठावली. यवतचे पोलिस निरिक्षक नारायण देशमुख, उपनिरीक्षक पूनम पाटील, पैरवी अधिकारी गोरख कसपटे, वेणूनाद ढोपरे यांनी या खटल्यात सहकार्य केले. मिलिंद संगई, बारामती.