‘टीसी’च्या खेळाडूंची आंतरराष्ट्रीय स्तरावर झेप

बारामती, ता. ५ : येथील तुळजाराम चतुरचंद महाविद्यालयाच्या वीस विद्यार्थ्यांनी विविध खेळांत भारतीय संघाचे प्रतिनिधित्व करत आंतरराष्ट्रीय स्तरावर दर्जेदार खेळाचे प्रदर्शन केले आहे. ८ ते १४ डिसेंबर दरम्यान मलेशियातील सॅलँगोर येथे होणाऱ्या आशिया कप कॉर्फबॉल स्पर्धेसाठी जाणाऱ्या भारतीय संघात महाविद्यालयाच्या निशा पांडिया व मान्सून बेग या खेळाडूंची निवड केली आहे. या खेळात मागील काही वर्षांपासून महाराष्ट्राचे संघ उत्कृष्ट कामगिरी करत आहेत.
आंतरराष्ट्रीय कॉर्फबॉल महासंघाच्या वतीने या महाविद्यालयाची माजी कॉर्फबॉल खेळाडू निकिता गायकवाड हिची याच स्पर्धेसाठी पंच म्हणून नियुक्ती केली आहे. आंतरराष्ट्रीय कॉर्फबॉल स्पर्धेसाठी पंच म्हणून नियुक्ती मिळणारी निकिता गायकवाड ही पहिली भारतीय महिला पंच आहे. भारतीय कॉर्फबॉल महासंघाचे अध्यक्ष हिमांशुनाथ मिश्रा व देवकुमार बलहारा यांनी निकिताची या स्पर्धेसाठी पंच म्हणून नियुक्ती झाल्याची घोषणा केली.
निकिताला डॉ. गौतम जाधव व अशोक देवकर यांनी प्रशिक्षण दिले. महाविद्यालयाचे प्राचार्य डॉ. अविनाश जगताप यांनी मार्गदर्शन केले. निशा पांडिया, मान्सून बेग आणि निकिता गायकवाड यांच्या या यशाबद्दल अनेकांत एज्युकेशन सोसायटीचे अध्यक्ष जवाहर शाह (वाघोलीकर), सचिव मिलिंद शाह (वाघोलीकर), प्राचार्य डॉ. अविनाश जगताप, रजिस्ट्रार अभिनंदन शहा व प्रा. डॉ. अजित तेळवे यांनी अभिनंदन केले.