उघड्यावर दारुपार्टी करणाऱ्यांवर कारवाईची मागणी

बारामती, ता. १५ : शहरातील अनेक मोकळ्या जागांवर दररोज रात्री अनेक जण मद्यपार्टी करत असल्याच्या बारामतीकरांच्या तक्रारी आहेत. अंधार व फारशी वर्दळ नसल्याचा फायदा घेत असे मद्यपी उघडपणे मद्यपान करत असल्याचे प्रकार सुरू आहेत. अनेकदा दारूची नशा चढल्यानंतर वादावादी व भांडणेही होतात, त्यामुळे गुन्हेगारीला चालना मिळत असल्याने हे प्रकार तातडीने थांबविण्याची बारामतीकरांची मागणी आहे.

शहरातील शारदा प्रांगणासारख्या अत्यंत मध्यवर्ती ठिकाणी दररोज अनेक दारूचे बिनधास्तपणे रात्र होताच मद्यपार्टी करतात. या शिवाय अनेक मोकळ्या जागांवरही लोकांचे लक्ष जाणार नाही, अशा बेताने लोक मद्य पित बसतात. नीरा डावा कालव्याच्या बाजूच्या रस्त्यावर तसेच रेल्वे स्थानक मैदानासह भिगवण रस्त्यावरही काही ठिकाणी लोक बिनधास्त मद्य दारू पित बसलेले असतात.
अनेक वादविवाद व भांडणे अशा सार्वजनिक ठिकाणी मद्यपार्टी झाल्यावर होतात, अनेक ठिकाणी महिलांना याचा त्रास होत असल्याच्या तक्रारी असून अशा ठिकाणांवर छापेमारी करून पोलिसांनी कारवाई करण्याची मागणी केली आहे.