बारामतीत पथदिव्यांच्या कामाचा प्रश्‍न प्रलंबित

बारामती, ता. ४ : येथील नगरपरिषद हद्दीतील विश्वासनगर व समर्थनगर परिसरात गेल्या अनेक महिन्यांपासून पथदिव्यांच्या (स्ट्रीट लाईट) कामांचा प्रश्न प्रलंबित असल्याची येथील नागरिकांची तक्रार आहे.
काही ठिकाणी विद्युत खांब उभारण्यात आले असले, तरी त्यावर दिवे बसविण्यात आलेले नाहीत, तर काही खांबांना अद्याप वीजपुरवठाच सुरू झालेला नाही. त्यामुळे हा परिसर अंधारात असून नागरिकांना अंधारातून मार्गक्रमण करावे लागत आहे.
नगरपरिषद निवडणुकीत हा प्रश्न सोडविण्याची ग्वाही देण्यात आली होती, प्रत्यक्षात निवडणूक होऊन अनेक दिवस उलटूनही या प्रश्नाकडे लक्ष दिले जात नसल्याची तक्रार आहे. नागरिकांनी चौकशी केल्यास उडवाउडवीची उत्तरे मिळत असल्याचेही काही जणांनी सांगितले. पथदिव्यांची गरज ही मुलभूत असून हा प्रश्न तातडीने सोडवावा अशी या परिसरातील नागरिकांची मागणी आहे.