जिजाऊ, स्वामी विवेकानंदांना जिजाऊ भवन येथे अभिवादन

बारामती, ता. १३ : येथील बारामती तालुका मराठा सेवा संघाच्या वतीने जिजाऊ भवन येथे सोमवारी (ता. १२) राजमाता जिजाऊ व स्वामी विवेकानंद यांची जयंती साजरी करण्यात आली.
या कार्यक्रमास प्रांताधिकारी वैभव नावडकर, तहसीलदार स्वप्निल रावडे, किशोर मेहता, रामानंद महाराज पंढरपूरकर, बारामती इंडस्ट्रियल डेव्हलपमेंट असोसिएशनचे अध्यक्ष धनंजय जामदार यांच्यासह बारामती तालुका मराठा सेवा संघ व जिजाऊ सेवा संघाचे अध्यक्ष, विश्वस्त, विविध क्षेत्रांतील मान्यवर व शिवप्रेमी मोठ्या संख्येने उपस्थित होते.
राजमाता जिजाऊ व स्वामी विवेकानंद यांच्या जीवनकार्याचा व विचारांचा आढावा रामानंद महाराज पंढरपूरकर यांनी आपल्या प्रवचनातून घेतला. कार्यक्रमादरम्यान सामाजिक बांधीलकी जपत लीलाबाई शेंडगे यांना मान्यवरांच्या हस्ते आर्थिक मदत देण्यात आली.
यावेळी जिजाऊ सेवा संघाच्या महिलांनी जिजाऊ वंदना सादर केली. जिजाऊ करिअर सेंटरच्या माध्यमातून विद्यार्थ्यांसाठी स्पर्धा परीक्षांची अभ्यासिका उपलब्ध करून देणे व आर्थिकदृष्ट्या दुर्बल विद्यार्थ्यांना जिजाऊ शिष्यवृत्तीच्या माध्यमातून उच्च शिक्षणासाठी मदत केली जात असल्याबद्दल मान्यवरांनी कौतुक केले.