बारामतीत हॉटेल बिलावरून एकावर प्राणघातक हल्ला

बारामती, ता. २३ : हॉटेलच्या बिलावरून झालेल्या वादातून मोरगाव रस्ता परिसरात एका ५३ वर्षीय व्यक्तीवर कुऱ्हाड आणि लोखंडी रॉडने प्राणघातक हल्ला करण्यात आला. या प्रकरणी दोघांना ताब्यात घेतले असून, जखमीवर तातडीने उपचार केल्याने त्यांचे प्राण वाचले आहेत. मुख्य आरोपीसह अन्य दोघे अद्याप फरार आहेत.
या प्रकरणी जखमी महेंद्र धोंडिबा गायकवाड (वय ५३, रा. खांडज) यांनी फिर्याद दिली आहे. विक्रम जगताप (रा. खांडज), जयदीप भोसले (रा. पाहुणेवाडी) यांना ताब्यात घेतले आहे. मुख्य आरोपी अक्षय जगताप व महादेव जाधव अद्याप फरार असून पोलिस त्यांचा शोध घेत आहेत. पोलिसांनी दिलेली माहिती अशी की, शनिवारी (ता. २१) रात्री हॉटेल बिलावरून झालेल्या वादाचा राग धरून, अक्षय जगताप व त्याच्या साथीदारांनी रविवारी (ता. २२) दुपारी मोरगाव रस्त्यावरील ग्लोबल हॉटेलसमोर गायकवाड यांना गाठले. आरोपींनी लाकडी दांड्याची कुऱ्हाड आणि रॉडने केलेल्या हल्ल्यात गायकवाड यांच्या पायाला व छातीला गंभीर इजा झाली. यावेळी आरोपींनी नागरिकांना धमकावून दहशत निर्माण करण्याचा प्रयत्न केला. घटनेची माहिती मिळताच उपविभागीय पोलिस अधिकारी सुदर्शन राठोड व निरीक्षक श्रीशैल्य चिवडशेट्टी यांनी तातडीने घटनास्थळी धाव घेतली. पोलिसांनी जखमी गायकवाड यांना स्वतः रुग्णालयात दाखल केले, ज्यामुळे त्यांचा जीव वाचला. ही कारवाई पोलिस अधीक्षक संदीपसिंग गिल व अतिरिक्त अधीक्षक गणेश बिरादार यांच्या मार्गदर्शनाखाली करण्यात आली.