चाकणला स्वच्छतागृह दाखवा अन् पैसे मिळवा

चाकण, ता. ४ : चाकण नगरपरिषदेच्या हद्दीतील मुख्य चौकात माणिक चौक, आंबेठाण चौक, तळेगाव चौक या मुख्य चौकात स्वच्छतागृह दाखवा आणि एक हजार रुपये मिळवा, असे नागरिकांचे म्हणणे आहे.
चाकण नगरपरिषदेच्या हद्दीत सुमारे दीड लाख लोकसंख्या आहे. मोठ्या प्रमाणात नागरिकांची ये-जा असते. नागरिकांना मुख्य चौकात स्वच्छतागृह कोठेच मिळत नाही.ज्येष्ठ नागरिकांना विधीला जायचे असेल तर स्वच्छतागृह शोधावी लागतात. परंतु, नगरपरिषदेचे स्वच्छतागृह या चौकात कोठेच नाही. त्यामुळे विधीला कोठे जायचे हा प्रश्न अनेकांना पडतो आहे.
नगरपरिषदेच्या हद्दीत दररोज रस्त्यावर पंचवीस ते पन्नास हजार नागरिक ये-जा करतात. स्वच्छतागृह नसल्यामुळे या नागरिकांची फार पंचाईत होते. गेली अनेक वर्ष स्वच्छतागृह, शौचालयगृह कोठेच नाही. नगरपरिषद नागरिकांच्या सुविधेसाठी स्वच्छतागृह उभारत नाही. वर्दळीच्या माणिक चौकात, आंबेठाण चौकात, तळेगाव चौकात ही स्वच्छतागृहे नगरपरिषदेची असणे गरजेचे आहे. परंतु, नगरपरिषद काहीच करत नाही. नगरपरिषदेच्या हद्दीतील अतिक्रमणे वाढत आहेत. नगरपरिषदेचे अधिकारी याकडे का दुर्लक्ष करतात, असा नागरिकांचा आरोप आहे.
चाकण शहरात नगरपरिषदेची एकवीस स्वच्छतागृह आहेत. नगर परिषदेने बीओटी तत्त्वावर शहरात मुख्य चौकामध्ये स्वच्छतागृह बांधणे गरजेचे आहे. नागरिकांच्या आरोग्याकडे नगरपरिषदेचे दुर्लक्ष आहे. नगरपरिषदेने या प्राथमिक मूलभूत सुविधा नागरिकांना देणे गरजेचे आहे. पण याकडे मात्र कोणाचेच लक्ष नाही हे भयानक वास्तव आहे.

‘स्वच्छतागृह बांधू’
याबाबत नगरपरिषदेचे मुख्याधिकारी चंद्रकांत भोसले म्हणाले, ‘‘ही समस्या बरोबर आहे. मी नुकताच पदभार सांभाळलेला आहे. मुख्य चौकात वर्दळीच्या ठिकाणी नगरपरिषदेच्यावतीने स्वच्छतागृह बांधण्यात येतील.’’