भैरवनाथांच्या उत्सवानिमित्त चाकण येथे दर्शनासाठी गर्दी

चाकण, ता. १२ : येथील ग्रामदैवत श्री भैरवनाथ महाराजांच्या उत्सवानिमित्ताने सोमवार (ता. १२) पहाटेपासून मंदिरात भाविकांनी तसेच नागरिकांनी, बारा वाड्यातील लोकांनी भैरवनाथाच्या दर्शनासाठी मोठी गर्दी केली होती.
चाकण (ता. खेड) येथील श्री भैरवनाथ महाराजांच्या उत्सवानिमित्ताने विविध कार्यक्रमांचे आयोजन केले आहे. यामध्ये अखंड हरिनाम सप्ताह, बैलगाडा शर्यत आदींचा समावेश होता. बैलगाडाशर्यतीसाठी सुमारे १९ लाख रुपयांची रोख बक्षीसे तसेच एक ट्रॅक्टर, चौदा दुचाक्या बैलगाडा शर्यतीत विजेत्या बैलगाडा मालकांना देण्यात येणार आहेत. भैरवनाथ महाराजांच्या पालखीची मिरवणूक शहरातून काढण्यात आली. उत्सवानिमित्ताने आनंद लोकनाट्य तमाशाचे आयोजन केले होते.दरम्यान अभिषेक व पूजा करण्यात आली. त्यानंतर सकाळी मार्केटयार्ड येथून चाकण शहरात हारतुरे व मांडवडहाळ्याची मिरवणूक वाद्यांच्या गजरात नागरिकांच्या, कार्यकर्त्यांच्या उपस्थितीत भंडार, गुलालाची उधळण केली. मंदिरात दर्शनासाठी भाविकांची मोठी गर्दी होती. भाविकांना प्रसादाचे वाटप करण्यात येत होते. मंदिरावर आकर्षक विद्युत रोषणाई केली आहे. चाकण शहरात विविध ठिकाणी यात्रेनिमित्ताने स्वागत कमानी उभारल्या आहेत. उत्सवानिमित्ताने मातीवरील कुस्त्यांचा आखाडा होणार आहे. आखाड्यासाठी सुमारे दोन लाखावर रुपयांची बक्षीसे पैलवानांना दिली जाणार आहेत. उत्सवाचे आयोजन चाकण यात्रा कमिटी व समस्त ग्रामस्थ चाकण यांच्यावतीने केले आहे.