चाकण परिसरात येणार नांगरटीला वेग

चाकण, ता. १३ : चाकण परिसरातील गावांमध्ये मंगळवारी (ता.१३) दुपारच्या सुमारास जोरदार पाऊस पडला. त्यामुळे रस्त्यावर तसेच शेतातही पाणी साचले. या पावसाने शेतीपिकांचे मोठे नुकसान झाले नाही. पावसामुळे वापसा निर्माण होऊन नांगरटीला वेग येणार आहे.

मात्र, काढणी केलेल्या कांद्याचे नुकसान झाले. बाजारात विक्रीसाठी आलेला कांदा झाकून न ठेवल्याने तो भिजला.
मे महिन्यात पहिलाच वळवाचा पाऊस पडला. बहुतांश शेतकऱ्यांनी शेतीची अद्याप नांगरट केलेली नाही. मात्र, शेतकऱ्यांच्या दृष्टीने हा पाऊस महत्त्वाचा आहे.
चाकण परिसरात अचानक आलेल्या पावसाने बाजारातील पथारीवाले, हातगाडीवाले यांची मात्र पळापळ झाली. चाकणला सोमवार (ता.१२) रात्रीपासून विजा चमकत होत्या. त्यामुळे पाऊस नक्की येणार, असा विश्‍वास शेतकऱ्यांना होता. दरम्यान, बहुतांश शेतकऱ्यांनी पाऊस पडल्याने समाधान व्यक्त केले.