आत्महत्येस प्रवृत्त केल्याप्रकरणी पतीसह नंदेस बेड्या

चाकण, ता. २६: मूळची परभणी जिल्ह्यातील तसेच सध्या खराबवाडी (ता. खेड) येथे राहणाऱ्या पूजा गजानन निर्वळ (वय २२) हिने २७ एप्रिल रोजी गळफास घेऊन आत्महत्या केली होती. ही आत्महत्या नसून हत्या असल्याचा आरोप तिच्या आई-वडिलांनी केला होता. त्यानंतर पोलिसांनी तिचा पती व नणंद या दोघांवर हुंडाबळी व आत्महत्येस प्रवृत्त केल्याप्रकरणी विविध कलमानुसार गुन्हा दाखल केला होता. त्यांना रविवारी (ता.२५) ताब्यात घेऊन अटक केली आहे.
महाळुंगे पोलिस ठाण्याचे वरिष्ठ पोलिस निरीक्षक नितीन गीते यांनी दिलेल्या माहितीनुसार, मृत पूजाचा पती आरोपी गजानन मुंजाजी निर्वळ (वय -२७ वर्षे रा.स्पाईन सिटी, खराबवाडी ता. खेड. मूळ रा. मु. पो.शेलवाडी ता. शेलु, जि. परभणी) तिची नणंद राधा बाळासाहेब यादव (वय -३१ वर्षे रा. स्पाईन सिटी खराबवाडी, ता. खेड. मूळ रा. मु. पो. शेलवाडी ता. शेलू,जि.परभणी) या दोघांना महाळुंगे पोलिस ठाण्यातील तपास पथकाचे सहाय्यक पोलिस निरीक्षक घाडगे व त्यांच्या पथकाने शेलू, ता.परळी वैजनाथ, जि. बीड या ठिकाणाहून ताब्यात घेऊन घेतले व अटक केली आहे. सासरच्या अत्याचाराला कंटाळून लग्नाच्या पाच महिन्यातच पूजाने आत्महत्येचा निर्णय घेतला. ही घटना घडली तेव्हा ती गरोदर होती. तिचे वडील गणेश बोचरे यांनी महाळुंगे पोलिस ठाण्यात फिर्याद दिली आहे. गाडी घेण्यासाठी माहेरून पन्नास हजार रुपये आण, असा तगादा तिचा पती गजानन निर्वळ याने पूजाकडे लावला होता. पतीकडून मानसिक व शारीरिक त्रास देण्यात येत होता. वडील व आई रेखा बोचरे यांनी पूजाला न्याय द्या अशी मागणी केली आहे.